Այն անձինք, ովքեր պաշտպանում են նախարարությունների օպտիմալացումը, որպես կանոն, օրինակ են բերում այլ երկրների եւ ասում, որ Հայաստանն այնպիսի մեծ պետություն չէ, որ շատ նախարարություններ ունենա: Այս մասին դեկտեմբերի 27-ին լրագրողների հետ հանդիպման ժամանակ հայտարարել է կրթական փորձագետ Սերոբ Խաչատրյանը:
Ըստ նրա, հարուստ եւ խոշոր երկրներում նախարարությունների դերը բավական ֆորմալ է, քանի որ նրանք ունեն լավ համակարգ:
Իսկ Հայաստանում համակարգերը չեն գործում: «Նման իրավիճակում շատ վտանգավոր է օպտիմալացման գնալը, եւ դա կարող է հանգեցնել մասնագիտական կառավարման մակարդակի անկման, քանի որ մեզ դեռեւս որոշակի ոլորտներում ինստիտուտների կառուցում եւ զարգացնում է սպասվում»,-պարզաբանել է Խաչատրյանը:
Անդրադառնալով ՀՀ մշակույթի նախարարության լուծարման խնդրին` փորձագետը նշել է, որ տվյալ որոշումը պայմանավորված է գերատեսչության վատ աշխատանքով, քանի որ այն, ըստ էության, աշխատել է որոշակի անձանց շահերի շրջանակներում: Սակայն, ըստ փորձագետի, եթե կան մարդիկ, ովքեր վատ են աշխատում, ապա նրանց կարող են կա՛մ աշխատանքից ազատել, կա՛մ ընդհանրապես փոխել Մշակույթի նախարարության մոտեցումները եւ աշխատանքային մեթոդները:
Նա համոզված է, որ նախարարությունների կրճատումն առավել արմատական մոտեցում է եւ ոչ մի երաշխիք չկա, որ մարդկանց «արդարորեն» կազատեն «աշխատանքից՝ ոչ թե սուբյեկտիվ հանգամանքներից ելնելով:
Բացի այդ, Սերոբ Խաչատրյանը շեշտել է, որ «վատ մասնագետների» հեռացումը կարող է ավելի խորացնել երկրում ստեղծված առանց այդ էլ ծանր սոցիալական վիճակը, քանի որ նավից դուրս մնացած մարդիկ կարող են ծայրահեղության գնալ՝ փորձելով, օրինակ, «իրենց վրա ձեռք բարձրացնել»:
