Աշխարհում անորոշության աճի պայմաններում ՆԱՏՕ շրջանակներում համագործակցությունը հարկավոր է ամրապնդնել եւ դաշինքի անդամ երկրների ռազմական ծախսերը ՀՆԱ-ի մինչեւ 2 տոկոսի հասցնել: Նորվեգիայի ձեռնարկությունների համադաշնության համաժողովին ելույթ ունենալիս այս մասին ասել է ՆԱՏՕ գլխավոր քարտուղար Յենս Ստոլտենբերգը, հաղորդում է ՏԱՍՍ-ը:
«Պայմանագրերը չեղարկվում են, մաքսային պատնեշներ են կառուցվում, միջազգային պայմանագրերը ճնշման տակ են գտնվում», - նրա խոսքը մեջբերում է Նորվեգիայի հեռագրային բյուրոն: Ի թիվս այլ բաների, նա նշել է, որ «Ռուսաստանը երկար տարիներ խախտել է Միջին եւ փոքր հեռահարության հրթիռների ոչնչացման պայմանագիրը», ինչը նրա կարծիքով, կարող է միջուկային սպառազինությունների արգելքի մասին պայմանագրերի համակարգի փլուզմանը հանգեցնել:
«Ինձ զարմացնում է, թե որքան քիչ ուշադրություն է դարձվում դրան», - ավելացրել է նա: Աշխարհում աճող անորոշության իրավիճակի հաղթահարման համար գլխավոր քարտուղարը կարծում է, որ պետք է աջակցել տրանսատլանտյան համագործակցությանը: Օսլոյն, իր հերթին, այս ուղղությամբ ավելի շատ ջանքեր կգործադրի, վստահ է նա: Ստոլտենբերգը նաեւ նշել է, որ Նորվեգիան «Ռուսաստանի հետ սահմանակից միակ երկիրն է, որը ՀՆԱ-ի 2 տոկոսից քիչ է հատկացնում պաշտպանական ծախսերին»:
Նա նշել է, որ ռազմական ծախսերի ավելացման հարցը հատկապես արդիական է, քանի որ շատ երկրներ, առաջին հերթին Միացյալ Նահանգները, ՆԱՏՕ-ի շրջանակներում դրանց բաշխումն անարդար են համարում: Նա հավելել է, որ չպետք է կարծել, որ ԵՄ-ի ընդհանուր պաշտպանության զարգացումը կարող է փոխարինել տրանսատլանտյան պաշտպանական համագործակցությանը:
«Բրեքսիտից հետո, ՆԱՏՕ-ի գումարային հոսքերի 80 տոկոսը ԵՄ անդամ չհանդիսացող երկրներից է գալու», - ընդգծել է նա:
ԱՄՆ-ն վերջին 20 տարիների ընթացքում ՆԱՏՕ-ի դաշնակիցներից պահանջել է պաշտպանական ծախսերը ՀՆԱ-ի մինչեւ 2 տոկոսի հասցնել: Ուկրաինական ճգնաժամի սկսվելուց հետո Վաշինգթոնն այդ նպատակին հասնելու համար օգտագործում էր ՌԴ հետ առճակատման տրամաբանությունը:
2014 թ. սեպտեմբերին Ուելսում՝ (Միացյալ Թագավորություն) ՆԱՏՕ-ի գագաթաժողովում, դաշինքի առաջնորդները պարտավորվել էին 10 տարվա ընթացքում ՆԱՏՕ-ի բոլոր երկրների ռազմական ծախսերը հասցնել ՀՆԱ-ի 2 տոկոսին: Վաշինգթոնը պնդում է, որ նոր միջոցների մեծ մասը ուղղվի նոր սպառազինության եւ ռազմական տեխնիկայի ձեռքբերմանը, որոնց հիմնական արտադրողը ՆԱՏՕ-ում ամերիկյան ռազմարդյունաբերական համալիրն է:
