2001թ․ սեպտեմբերի 11-ի ահաբեկչության զոհերի հարազատների բողոքներից հետո Սաուդյան Արաբիայի դրոշի պատկերով արձանը կհեռացվի Նյու Յորքի Ground Zero-ից։
Հիշեցնենք, որ 19 ահաբեկիչներից 15-ը Սաուդյան Արաբիայից էին, թեեւ թագավորությունը բազմիցս հերքել է 3000 կյանք խլած ողբերգությանն իր մասնակցությունը։
Candy Nations անվանումով ստեղծագործությունն իրենից ներկայացնում է կոնֆետներ, որոնք փաթաված են G20-ի երկրների դրոշներով, այդ թվում՝ Արգենտինայի, Ֆրանսիայի, Հարավային Կորեայի եւ Սաուդյան Արաբիայի։ Ֆրանսիացի նկարչուհի Լոուրենս Ջենքելն ասել է, որ ինքը գործը ստեղծել է 2011թ․, որպեսզի «արժանին մատուցի ամբողջ աշխարհի մարդկանց»։
Արձանը դրվել է աշխարհի 25 երկրներում եւ անցյալ ամիս բերվել է Նյու Յորք ու տեղադրվել նախկին Համաշխարհային առեւտրի կենտրոնի տեղում։ Այն պետք է այդտեղ մնար մինչեւ փետրվարի 28-ը, սակայն բողոքներից հետո արձանը որոշել են տեղափոխել Քենեդու անվան օդանավակայան։