Երբ Հայաստանը որեւէ ընկերության ներառում է իր «սեւ ցուցակի» մեջ, ԵՏՄ անդամ պետությունները նույնպես կարող են այդ մասին իրազեկված լինել, քանի որ ցուցակը հրապարակային է, իսկ գործընկեր երկրները այդ ցուցակը գաղտնի են պահում: Հունվարի 17-ին ԱԺ նիստում Տարածաշրջանային հարցերով եւ եվրասիական ինտեգրացիայի խորհրդարանական մշտական հանձնաժողովի ղեկավարի պաշտոնի թեկնածության քննարկման ժամանակ այս մասին ասաց «Իմ քայլը» դաշինքի պատգամավոր Արտակ Մանուկյանը՝ դիմելով այս պաշտոնի հավակնորդ, «Բարգավաճ Հայաստան» կուսակցությունից պատգամավոր Միքայել Մելքումյանին:
Մանուկյանի խոսքով՝ ստացվում է, որ ցանկացած ընկերություն, որը հայտնվել է որեւէ երկրի սեւ ցուցակի մեջ, որը ԵՏՄ անդամ է, կարող է Հայաստանի տարածքում հանգիստ մասնակցել պետական գնումների մրցույթին:
Պատգամավորը Մելքումյանին կոչ արեց պրոֆիլային հանձնաժողովի ղեկավարի պաշտոնում ընտրվելու դեպքում այս հարցը քննարկման առարկա դարձնել իր ղեկավարելիք կառույցի շրջանակում:
Մելքումյանը պատասխանեց, որ այս դիրքորոշմանը լիովին աջակցում է, եւ հավելեց, որ իրենք պետք է հասնեն մրցակցության պայմաններում հավասարության ու թափանցիկության սկզբունքների պահպանմանը:
Նրա խոսքով՝ երրորդ երկրներում հայկական ընկերությունների մասնակցությունը պետական գնումների մրցույթներին ուշադրության արժանի է, բայց պետք է լրջորեն դիտարկվի եւ քննարկվի: