Ես դա պարոն Մարուքյանին չեմ ասել, ընդհանուր եմ ասել, որ բոլորի հանդեպ շատ հարգալից ենք, ոչ մեկի վրա ցեխ չենք շպրտում, բայց որեւէ մեկը, ով փորձի մեզ վիրավորել, պատասխանը ստանալու է եւ դոկումենտալ, փաստացի կներկայացնենք: Այս մասին, այսօր՝ հունվարի 18-ին, ԱԺ-ում լրագրողների հետ զրույցում նշեց ԲՀԿ առաջնորդ Գագիկ Ծառուկյանը՝ անդրադառնալով «Լուսավոր Հայաստան» խմբակցության ղեկավար Էդմոն Մարուքյանի հասցեին իր արած հայտարարությանը:
Հարցին, թե ստացվում է, որ դուք Մարուքյանի մասին տեսանյութե՞ր ունեք, նա արձագանքեց. «Բոլորի վրա էլ ունեմ»:
Ինչ վերաբերում է Էդմոն Մարուքյանի դիտարկմանը, որ եթե իսկապես կան տեսանյութեր, նշանակում է ապօրինի իրենց նկարահանել ու ձայնագրել են, Ծառուկյանն արձագանքեց, որ իր ասածը վերաբերում է բոլորին, ով կփորձի վիրավորել իրենց:
Ավելի վաղ NEWS.am-ը հայտնել էր, որ ԱԺ-ում իր ելույթի ժամանակ Ծառուկյանն անդրադառնալով Էդմոն Մարուքյանին, ասել էր. «Եկել եմ մեր կլասիկ պատգամավոր Էդմոն Մարուքյանին մի երկու բառ ասեմ: Ես ոչ մի խնդիր չունեմ, ինքն է հարցը տվել, ես պատասխանել եմ: Դրանից հետո ինքը մոտեցել է, ես իր ձեռքը սեղմել եմ, հետո էլ շնորհավորել եմ: Ասում են՝ Ծառուկյանը պետք է քաղաքականությունից դուրս գա, որ Ծառուկյանը չլիներ, մենք կլինեինք երկրորդը: Կարելի է «Իմ քայլին» էլ ասել՝ իրենք էլ չմասնակցեինք, կլինեիք առաջինը: Ես ասում եմ՝ մինչեւ մեզ չվիրավորեն, չկպնեն, մենք ոչ մի բան ոչ մեկին չենք ասի: Եթե որեւէ մեկը փորձեց ասել, վիրավորել, դրա պատասխանը դոկումենտալ, փաստաթղթով, տեսաժապավենով ներկայացնելու եմ»:
