Վաշինգթոնի Dupont Circle հյուրանոցում սկսվել է ԱՄՆ պետքարտուղար Մայք Պոմպեոյի եւ Հյուսիսային Կորեայի Աշխատավորական կուսակցության միասնական ճակատի բաժնի վարիչ Կիմ Յոն Չխոլի հանդիպումը։ Տեքստային հեռարձակումը վարում է The Washington Post-ը։
Պոմպեոն եւ Չխոլը դուրս են եկել լրագրողների մոտ, միմյանց ձեռք են սեղմել, այնուհետեւ հեռացել են առանձին սենյակ՝ խորհրդակցությունների համար։ Նրանք չեն պատասխանել մամուլի հարցերին։ Բանակցություններին, ինչպես նշում է թերթը, ներկա է ԿԺԴՀ-ի հարցերով Պետդեպի հատուկ ներկայացուցիչ Սթիվեն Բիգենը։
Ամերիկյան եւ հարավկորեական ԶԼՄ-ների տվյալներով՝ Կիմ Յոն Չխոլը Վաշինգթոն է ժամանել հինգշաբթի օրը։ Ակնկալվում է, որ նա խորհրդակցություններ կանցկացնի նաեւ Դոնալդ Թրամփի հետ։ Սակայն ԱՄՆ նախագահի գրաֆիկում, որ տարածել է Սպիտակ տունը, նման հանդիպում չի նշվում։
Բացի այդ, Չխոլը կարող է հանդիպել նաեւ ԿՀՎ ղեկավար Ջինա Հեսփելի հետ, ով ըստ The Washington Post-ի, վերջին ամիսներին ավելի ակտիվ դեր է խաղում ԿԺԴՀ-ի հետ բանակցություններում։
Բանակցությունների ընթացքում կքննարկվեն ԱՄՆ-ԿԺԴՀ երկրորդ գագաթաժողովի մանրամասները, որն, ամենայն հավանականությամբ, կանցկացվի մարտին կամ ապրիլին։