ՆԱՏՕ-ի եւ Ռուսաստանի ներկայացուցիչների հանդիպումը չօգնեց հաղթահարել Փոքր եւ միջին հեռահարության հրթիռների ոչնչացման մասին պայմանագրի շուրջ տարաձայնությունները: Ինչպես հանդիպումից հետո է հայտարարել Դաշինքի գլխավոր քարտուղար Յենս Ստոլտենբերգը, «պայմանագիրը գտնվում է իրական սպառնալիքի տակ»՝ ավելացնելով, որ Ռուսաստանը պատրաստ չէ փոխզիջման:
Նրա խոսքերով, դաշնակիցները եւ Ռուսաստանը քննարկել են երկու կարեւոր թեմա՝ Ուկրաինան եւ ՓՄՀՀՊ-ն: «Այս երկու հարցերի շուրջ էլ դաշնակիցները եւ Ռուսաստանը հիմնականում չեն համաձայնվում, դրա համար էլ կարեւոր է ասելը՝ խնդիրները լուծել, բարձրացնել կանխատեսելիությունը եւ նվազեցնել ռիսկերը», - ասել է նա:
«Ռուսաստան-ՆԱՏՕ Խորհրդի բոլոր անդամները համաձայն են, որ ՓՄՀՀ պայմանագիրը վճռորոշ է եվրաատլանտյան անվտանգության համար: Սակայն պայմանագիրը հիմա վտանգի տակ է: Եվ, ցավոք, մենք չենք տեսնում որեւէ առաջընթացի նշաններ: ՆԱՏՕ-ի երկրների արտաքին գործերի նախարարները դեկտեմբերին հանդիպեցին այդ հարցի շուրջ: Եվ բոլոր դաշնակիցները համաձայնել են, որ 9M729 ռուսական հրթիռը խախտում է պայմանագիրը: Այսօր Դաշնակիցները հերթական անգամ կոչ են արել Ռուսաստանին վերադառնալ Պայմանագրի լիակատար եւ վավերական պահպանմանը: Նրանք նաեւ հաստատկամություն են հայտնել աջակցելու եւ ամրապնդելու սպառազինությունների իրական եւ ստուգելի վերահսկումը», - ասել է նա` նշելով, որ ՆԱՏՕ-ն շարունակում է հավատարիմ մնալ երկխոսության շարունակմանը:
