Չեմ կարծում, որ Հայաստանում թավշյա հեղափոխության ժամանակ Ռուսաստանի կողմից միջամտության կոնկրետ փորձեր են եղել: ՌԲԿ հեռուստաալիքին տված հարցազրույցում այս մասին ասել է ՀՀ վարչապետ Նիկոլ Փաշինյանը՝ պատասխանելով հարցին այն մասին, որ «The Economist»-ը Հայաստանը 2018-ի երկիր է անվանել եւ հոդվածում նշվել էր, որ «Պուտինի դրածոն վտարվել էր, ոչ ոք չէր սպանվել, Ռուսաստանին միջամտելու առիթ չէին տվել»: Ստացվում է՝ տարվա երկիր դառնալու համար, հարկավոր է այս երկու պայմաններին համապատասխանել:
«Դա «The Economist»-ին, ոչ թե ինձ ուղղված հարց է: Բայց ինձ հաճելի է, որ Հայաստանը տարվա երկիր է եւ չեմ կարծում, որ որեւէ երկիր հրաժարվել է այդ կարգավիճակից: Դա իհարկե հաճելի է »,- նշել է Փաշինյանը:
Հարցին այն մասին՝ արդյոք ՌԴ միջամտությունը թույլ չտալու փորձեր են արվել, Փաշինյանը պատասխանել է.
«Ես չեմ կարծում, որ ՌԴ կողմից միջամտության կոնկրետ փորձեր են եղել: Վլադիմիր Պուտինի հետ մեր առաջին զրույցների ընթացքում ես շնորհակալություն հայտնեցի ՌԴ-ին մեր ներքին քաղաքական գործընթացների ժամանակ հավասարակշռված դիրքորոշման համար: Կարծում եմ, փաստ է, որ ՌԴ դիրքորոշումը հավասարակշռված է եղել»:
