ԱՊՀ տարածքում Ռուսաստանի գործունեությունը, եւ, մասնավորապես, այնպիսի «մոտ» երկրում ինչպիսին Հայաստանն է, միջազգային ասպարեզում աշխատանքի առաջնային ուղղություններից է։ Այս մասին Հայաստանում ՌԴ դեսպանությունում անցկացված «Միջազգային զարգացմանը նպաստելու ասպարեզում Ռուսաստանի Դաշնության գործունեության մասին» համաժողովում հունվարի 30-ին հայտարարեց Հայաստանում ՌԴ դեսպան Սերգեյ Կոպիրկինը։ Նրա խոսքերով, ՄԱԿ ներկայացուցիչների հետ լավ փոխգործակցություն է ստեղծվել։
«Մենք կարծում ենք, որ Ռուսաստանի կողմից ֆինանսավորվող ծրագրերի առյուծի բաժինը պատկանում է նրանց։ Ռուսաստանը կշարունակի նրանց հետ համագործակցել եւ նպաստել ծրագրերի իրականացմանը»,- ընդգծեց Կոպիրկինը։ Իր հերթին, ԱՊՀ-ի, արտասահմանում ապրող հայրենակիցների եւ միջազգային մարդասիրական համագործակցության հարցերով դաշնային գործակալության («Ռոսսոտրուդնիչեստվո») ղեկավարի տեղակալ Պավել Շեւցովը ավելի մանրամասն տվյալներ ներկայացրեց ՌԴ-ի կողմից Հայաստանին աջակցության վերաբերյալ։
«Վերջին տարիներին Հայաստանին օգնությունը վատ տեմպերով չի զարգացել։ Հատկացված օգնության միջին ծավալը 2009-2014թթ․ կազմել է տարեկան մոտ 19 միլիոն դոլար։ 2013-2015թթ․ Ռուսաստանը ներդրել է մինչեւ 10 միլիոն՝ դպրոցական սննդի համալիր համակարգի ստեղծման ծրագրերն իրականացնելու համար»,- պարզաբանել է Շեւցովը՝ հավելելով, որ 2014թ․ Ռուսաստանի կառավարությունը հավանության է արժանացրել մինչեւ 2019թ․ Հայաստանի գյուղական համայնքների զարգացման ծրագրի համալիր աջակցությունը։ Հայաստանը, նրա խոսքերով, առաջատար է ռուսական համալսարանների մասնաճյուղերի թվով, եւ ներկայում 5,5 հազար ՀՀ քաղաքացիներ սովորում են Ռուսաստանում։ Նրանցից 1,5 հազարը ստանում է ՌԴ կառավարության տրամադրած թոշակ։