Հոնկոնգի օդանավակայանում 1 մլն դոլար արժողությամբ ռնգեղջյուրի եղջյուրներ են բռնագրավել: AFP-ն հաղորդում է, որ 24 եղջյուրների մաքսանենգության փաստով երկու տղամարդ է ձերբակալվել: Մաքսային ծառայությունը նշել է, որ դա ռնգեղջյուրի եղջյուրների հայտնաբերված ամենախոշոր խմբաքանակն է:
Տղամարդիկ ժամանել էին Յոհանեսբուրգից եւ մտադիր էին Վիետնամ մեկնել:
Ռնգեղջյուրի եղջյուրների պահանջարկ կա Չինաստանում եւ Վիետնամում, որտեղ ժողովրդական բժշկության որոշ մասնագետներ այն որպես հրաշալի բաղադրիչ են գովազդում:
Ասիայում եղջյուրների մեկ կիլոգրամը կարող է մինչեւ 60 հազար դոլարի շահույթ բերել, ինչն էլ անդրազգային հանցավոր ցանցերի առաջացման պատճառ է դարձել, որոնք վերջին տասնամյակներին ոչնչացրել են ռնգեղջյուրների պոպուլյացիաները:
Ամենից շատ տուժել է Հարավային Աֆրիկան, որտեղ ապրում է աշխարհի ռնգեղջյուրների մոտ 80 տոկոսը: