Ֆրանսիան Բրիտանիային կոչ է անում «շտապել» եւ որոշել՝ արդյոք նա Եվրամիությունից հեռանում է պայմանագրով, թե առանց դրա : Այս մասին հայտարարել է Եվրոպական հարցերով նախարար Նատալի Լուազոն, հաղորդում է AP-ն:
Լուազոյի խոսքով՝ «ժամանակն է, որ մեր բրիտանացի գործընկերները որոշեն՝ ցանկանում են բարեկամաբար, թե կոշտ հեռանալ: Նա նշել է, որ ԵՄ-ն լրջորեն ջանք է գործադրել Բրիտանիայի վարչապետ Թերեզա Մեյի կառավարության հետ համաձայնագրի հասնելու համար եւ «մի փոքր դժվար է պատկերացնել, որ նրանք չեն կարողանում իրագործել սեփական առաջարկները»:
Նախօրեին Մեյը հերթական ձախողումն է ունեցել խորհրդարանում, որը կրկին մերժել էր Brexit-ի հետ կապված գործարքը, ինչն ավելի է ուժգնացրել մտավախությունները, որ երկիրը կարող է ԵՄ-ից առանց համաձայնագրի կնքման դուրս գալ, որի արդյունքում առեւտրի մաքսատուրքեր կսահմանվեն:
Լուազոն ասել է, որ Բրիտանիան պետք է շտապի եւ որոշում ընդունի Brexit-ից տուժած բոլոր ձեռնարկությունների եւ քաղաքացիների համար:
