Հենց ես եմ եղել Կառավարության ծրագրում փոփոխություններ կատարելու նախաձեռնողը, ինչը իշխող ուժը մերժեց: Այս մասին փետրվարի 18-ին ԱԺ-ում ավանդական ճեպազրույցների ժամանակ ասաց ԱԺ Եվրասիական եւ տարածաշրջանային ինտեգրման մշտական հանձնաժողովի նախագահ Միքայել Մելքումյանը՝ մեկնաբանելով Կառավարության ծրագրի տնտեսական հատվածը:
Նրա խոսքով՝ նրանք ասում էին, որ ծրագրում կարող են գրված լինել «շատ լավ բաներ»՝ լցված ցուցանիշներով եւ թվերով: «Սակայն գոյություն ունեն մի քանի կարեւոր գործիքներ, որոնք պետք է դառնան ծրագրի իրականացման երաշխիքը: Եթե հիշում եք, իմ առաջարկից հետո ԱԺ նախագահ Արարատ Միրզոյանը նշեց, իբր, վարչապետն օպերատիվորեն արձագանքում է, եւ իբր, կարող եք առաջարկները ներկայացնել»,- ասաց Մելքումյանը:
Ընդ որում՝ նա նշեց, որ ծրագիրն ինչ-որ համաձայնագիր չէ, որը խիստ իրավական կտրվածքով պետք է պարունակի համընդգրկուն պարտավորություններ: «Բայց մենք նաեւ գրանցում ենք քաղաքական պարտավորությունները եւ հարգում ենք քաղաքական պայմանավորվածությունները: Ես անձամբ առաջարկել էի, որ բոլոր խմբակցությունների ներկայացուցիչները ԱԺ նախագահի մոտ հավաքվեին ընդմիջումներից մեկի ժամանակ եւ որոշակի քաղաքական պայմանավորվածությունների հասնեն, ինչը տեղի չունեցավ»,- դժգոհեց Միքայել Մելքումյանը: