«Նուբարաշեն» ՔԿՀ–ում հացադուլ հայտարարած 5 անձանցից երկուսը կալանավորներ են։ Այս մասին NEWS.am–ին հարցին ի պատասխան ասաց  ՀՀ ԱՆ քրեակատարողական վարության հանրային կապերի բաժնի պետ Նոնա Նավիկյանը։ Նա նշեց, որ կալանավորներից մեկը հացադուլը սկսել է փետրվարի 10–ին, իսկ մյուսը՝ փետրվարի 11–ին։ Նրանք դժգոհում են իրենց վերաբերյալ քննվող քրեական գործերից։ Նշենք, որ Փետրվարի 11 –ին հացադուլ է հայտարարել նաև դատապարտյալներից մեկը։

Փետրվարի 12–ից անժամկետ հացադուլ են հայտարարել նաև «Նուբարաշեն» քրեակատարողական հիմնարկում պատիժը կրող ցմահ դատապարտյալներ Արմեն  Տեր–Սահակյանը և Արամ Խաչիկյանը։ Տեր Սահակյանը պահանջում է հանդիպում Արդարադատության նախարար Արտակ Զեյնալյանի հետ, իսկ Խաչիկյանը պահանջում է վերաբացել իր նկատմամբ քննված քրեկան գործը։ Երկուսն էլ դժգոհ են պայմանական վաղաժամկետ ազատ արձակման ինստիտուտից։

Ավելի վաղ հայտնել ենք, որ Մարդու իրավունքների պաշտպանին հասցեագրված բողոքների հիման վրա Պաշտպանի հանձնարարությամբ փետրվարի 14-ին այց է իրականացվել Արդարադատության նախարարության «Նուբարաշեն» քրեակատարողական հիմնարկ, որտեղ առանձնազրույցներ են տեղի ունեցել ազատությունից զրկված անձանց, այդ թվում՝ հացադուլ հայտարարած 5 անձի հետ։