Վանաձորում մեկնարկել է «Իմ քայլը հանուն Լոռու մարզի» ներդրումային բիզնես ծրագրերի ֆորումը:

Միջոցառմանը մասնակցում են Հայաստանի ու արտերկրի հայ եւ օտար մեծաթիվ գործարարներ ու ներդրողներ: Ֆորումին ներկա են ՀՀ վարչապետ Նիկոլ Փաշինյանը, ՀՀ տարածքային կառավարման եւ զարգացման նախարար Սուրեն Պապիկյանը,  ՀՀ տնտեսական զարգացման եւ ներդրումների նախարար Տիգրան Խաչատրյանը, Տրանսպորտի, կապի եւ ՏՏ նախարար Հակոբ Արշակյանը, Արմավիրի, Գեղարքունիքի, Արարատի մարզպետները եւ գործադիրի այլ ներկայացուցիչներ։

Բիզնես համաժողովի ընթացքում կներկայացվեն Լոռու մարզում տուրիզմի, գյուղատնտեսության, արդյունաբերության, տեղեկատվական տեխնոլոգիաների եւ մի շարք այլ ոլորտների զարգացմանն ուղղված ներդրումային ավելի քան 50 ծրագրեր, որոնք կարող են դառնալ շահութաբեր բիզնեսի հավակնոտ առաջարկներ ներդրողների համար։

Համաժողովի շրջանակում նախատեսվում են նաեւ ոլորտային քննարկումներ, ինչպես նաեւ տեղական արտադրանքի EXPO ցուցահանդես՝ շուրջ 40 ընկերությունների մասնակցությամբ։

Լոռիում անցկացվող բիզնես համաժողովը  կբացի ՀՀ ՏԿԶ նախարարության եւ մարզպետարանների նախաձեռնությամբ, ՓՄՁ ԶԱԿ հիմնադրամի աջակցությամբ իրականացվող այս տարվա մարզային բիզնես ֆորումների շարքը։ 2019թ․ կիրականացվեն մարզերի տնտեսության ու համայնքների զարգացմանն  ուղղված եւս 8 համաժողովներ հանրապետության մյուս մարզերում։