Բրյուսել այցը կոնկրետ նպատակ ունի՝ մենք պատրաստվում ենք Եվրամիության ներկայացուցիչների հետ քննարկել Եվրամիության հետ համապարփակ եւ ընդլայնված գորընկերության մասին համաձայնագրի իրականացումը: Այս մասին ՏԱՍՍ-ի հետ հարցազրույցում հայտարարել է Հայաստանի վարչապետ Նիկոլ Փաշինյանը՝ ի պատասխան այն հարցին, թե Բրյուսելում ո՞րն է քննարկումների օրակարգը:
«Ես ցանկանում եմ ընդգծել մի կարեւոր դետալ. մենք այս գործընթացում մեր ռուսաստանցի գործընկերների համար բացարձակապես թափանցիկ ենք: Եվ սա շատ կարեւոր է, Եվրամիությունն այս գործընթացում չի դնում որեւէ աշխարհաքաղաքական կամ արտաքին քաղաքական հարցեր կամ պայմաններ: Այս համագործակցությունը վերաբերում է միայն Հայաստանում ներքին ժողովրդավարական բարեփոխումներին, հատկապես անցյալ տարի երկրում տեղի ունեցած իրադարձություններից հետո»,- ասել է Փաշինյանը՝ նշելով, որ բարեփոխումների այդ օրակարգը Հայաստանի համար անչափ կարեւոր է: