Մեր հիմնական խնդիրներից մեկը հարկային համակարգի առավելագույն պարզեցումն է եղել, եւ 23 տոկոս համահարթ եկամտահարկի սահմանումը՝ ամենակարեւոր խնդիրներից մեկը, որ պիտի լուծվի: Այս մասին այսօր՝ մարտի 7-ին կառավարության նիստում Հարկային օրենսգրքի փոփոխությունների քննարկման ժամանակ նշեց ՀՀ վարչապետ Նիկոլ Փաշինյանը:
Նրա խոսքով, իրենց նպատակն է առաջիկա 5 տարիներին այդ ցուցանիշը հասցնել 20 տոկոսի:
«Հաջորդ կարեւոր նպատակադրումն է, որ ստվերային աշխատավարձերը դուրս գան: Այսօր մենք գիտենք, որ ՀՀ-ում կա ստվերային աշխատավարձի տրամաբանություն: Եթե կառավարությունում եղել է, ուրեմն պետք է պատկերացնել, որ այլ մարմիններում էլ կա: Այսինքն, կա ֆորմալ գրանցված աշխատավարձ եւ ծրարով տրվող աշխատավարձ: Հույս ունենք, որ կխթանենք աշխատավարձերը հարկային դաշտ բերելը, դրա համար բարձր աշխատավարձերի եկամտահարկն իջեցնում ենք, քանի որ բարձր աշխատավարձերի մեծ մասը եկել, այդ 23 տոկոսի շեմի պռնկին կանգնել է եւ ոչ մի տեղաշարժ ցույց չի տալիս: Սա մի տեղեկություն է, որ մեզ որոշակի մտածելու տեղիք է տալիս: Այս պրոցեսն էլ պետք է դինամիկ լինի, պետք է հասկանանք՝ ինչն ինչ արդյունքների է բերում եւ ինչ արձագանքի է արժանանում»,- ասաց Փաշինյանը:
Նա ղեկավարը հույս հայտնեց, որ իսկապես աշխատավարձերը ստվերից կանցնեն օրինական դաշտ:
Վարչապետը նշեց՝ 2018-ին Հայաստանում տեղի ունեցած փոփոխություններից հետո 37 000 աշխատատեղ մի քանի ամսվա ընթացքում հայտնվեց. «Այսինքն դրանց մեծ մասը եղած, բայց չգրանցված աշխատատեղերն էին: Հույս ունեմ, որ այս գործընթացը կշարունակվի»:
Փաշինյանը նաեւ հայտարարեց, որ այս քայլով ուզում են խրախուսել բարձր աշխատավարձերը:
