Որքան էլ իշխանությունները հայտարարեն, թե մենաշնորհները վերացել են, յուրաքանչյուր գործարար կարող է գործունեությունը ծավալել ցանկացած ոլորտում, միեւնույն է, դեռ երկար ժամանակ գերիշխող դիրք գրավող գործարարները կպահպանեն իրենց դիրքերը: Այս մասին NEWS.am-ի հետ զրույցում նշեց Հայաստանի գործատուների միության նախագահ Գագիկ Մակարյանը:
«Իմ հաշվարկներով, առնվազն 3 տարի դա կպահպանվի, որովհետեւ մենաշնորհը միայն այն չէ, որ ասես՝ ով ինչ ուզում է, կարող է բերել եւ այն վերանա: Մենաշնորհները Հայաստանում ինստիտուցիոնալ ձեւ են ստացել: Օրինակ, եթե խոշոր ներկրողը, որն ունի շատ փող, կարող է բերել տասնյակ հազար տոննայով ապրանք, նա ունի պահեստեր, որ կարող է այդ բեռը պահել, ունի խանութների ցանցեր, սուպերմարկետներ, որտեղ կարող է իրացնել այդ ապրանքը: Ոչ ոք չի կարող այդ մենաշնորհների դեմ պայքարել»,-ասաց Մակարյանը:
Նա նկատեց, որ նոր շուկա մտնողը պետք է ունենա բոլոր այդ պայմանները, որ կարողանա մրցակցել մենաշնորհ ունեցողի հետ. «Այդպիսի խոշոր քանակներ ներկրողներ պետք է հայտնվեն, որպեսզի մենաշնորհը հնարավոր լինի հաղթահարել: Կամ էլ հազարավոր մարդիկ իրենց սեփական գործարանների, սեփական բիզնեսի համար պետք է բերեն այդ նույն ապրանքից, որը հանրագումարով մրցունակ կլինի խոշոր ներկրողի հետ: Բայց 1000 այդպիսի մարդ գտնելը եւս ժամանակ է պահանջում: Ամեն մարդ դրա ժամանակը չունի, լրացուցիչ այդքան գումար չունի, ենթակառուցվածքները չունի»,-ասաց տնտեսագետը՝ հավելելով, որ մենաշնորհ ունեցողներն ունեն հստակ գործող ենթակառուցվածքներ եւ իրենք մյուսների համար դառնում են մատակարար: