Ղարաբաղյան հակամարտության կարգավորման հարցում վերջին հայտարարությունը, որ կատարել են ԵԱՀԿ Մինսկի խմբի համանախագահները, ներկայացնում է միայն անմիջաբար իրենց՝ միջնորդների դիրքորոշումը: Մարտի 11-ին ԱԺ-ում ավանդական ճեպազրույցների ժամանակ այս մասին ասաց իշխող «Իմ քայլը» դաշինքի պատգամավոր Վլադիմիր Վարդանյանը:
Պատգամավորը նշեց, որ հայկական կողմի դիրքորոշումն արտահայտել է երկրի վարչապետ նիկոլ Փաշինյանը՝ հավելելով, որ բանակցային գործընթացի ժամանակ կողմերը կարող են արտահայտել հիմնախնդրի վերաբերյալ իրենց տեսակետն ու դիրքորոշումը: «Ինչպես նշել է Հայաստանի վարչապետը, ղարաբաղյան հակամարտության կարգավորման բանակցային գործընթացի հիմքում պետք է դրվի հակամարտության կարգավորման այնպիսի ճանապարհ գտնելու սկզբունքը, որը կհամապատասխանի ինչպես հայկական կողմի, այնպես էլ Ղարաբաղի ու Ադրբեջանի ժողովուրդների շահերին»,- ասաց պատգամավորը: Ընդ որում՝ նա ԵԱՀԿ Մինսկի խմբի համանախագահների հայտարարությունը գնահատեց որպես արդյունքների ամփոփման յուրատեսակ փորձ Հայաստանում մինչեւ «թավշյա հեղափոխությունը» ձեւավորված օրակարգի ներքո:
Վարդանյանը շեշտեց, որ այս հայտարարության դրույթները չեն խոչընդոտում ԼՂՀ բնակիչների իրավունքների պաշտպանությանը՝ հավելելով, որ համանախագահների հայտարարությունը անհրաժեշտ է դիտարկել բանակցային գործընթացի գործող ձեւաչափը հենց ԵԱՀԿ Մինսկի խմբի շրջանակում պահպանելու ենթատեքստում: «Իմ քայլից» պատգամավորը, միաժամանակ, այս հայտարարությունը գնահատեց «ավելի շուտ դրական», քանի որ «այն ուղղված է ղարաբաղյան հիմնախնդրի բացառապես խաղաղ կարգավորմանը ՄԱԿ Կանոնադրությամբ ամրագրված սկզբունքների հիման վրա»: «Այս ձեւաչափը նոր չէ: Նման հայտարարություններ կատարվել են նաեւ անցյալում, եւ անհրաժեշտություն չկա ինչ-որ բան ենթատեքստից կտրելու եւ փորձելու ներկայացնել որպես ինչ-որ «հեղափոխական» հայտարարություն: Սա դիվանագիտական աշխարհին հատուկ հայտարարություն է»,- եզրափակեց խորհրդարանական մեծամասնության ներկայացուցիչը: