ԱՄՆ պետքարտուղար Մայք Պոմպեոն եւ Սպիտակ տան խորհրդականներ Ջարեդ Քուշներն ու Ջեյսոն Գրինբլատը Հորդանանի թագավոր Աբդալլայի հետ քննարկել են Մերձավոր Արեւելքում խաղաղ կարգավորման հեռանկարները՝ հայտնում է Reuters-ը։
45 րոպեանոց հանդիպումը կայացել է ԱՄՆ-ում Հորդանանի դեսպանի առանձնատանը։
Քուշները եւ Գրինբլատը վերջերս են վերադարձել Պարսից ծոցի երկրներով շրջագայությունից, որի ընթացքում նրանք դիմել են արաբական երկրների առաջնորդներին՝ համոզելով աջակցել պաղեստինա-իսրայելական հակամարտության կարգավորման «դարի գործարքին»։ Այդ շրջագայության մեջ, սակայն, ներառված չէր Հորդանան այցը։
Աբդալլա թագավորը պետք է հանդիպի ամերիկյան օրենսդիրների, ինչպես նաեւ՝ պաշտպանության նախարարի պաշտոնակատար Պատրիկ Շանահանի հետ, որպեսզի քննարկի Հորդանանի եւ Միացյալ Նահանգների միջեւ ռազմական եւ պաշտպանական համագործակցությանը վերաբերող հարցեր։