Եվրոպական միությունը փոխզիջման որոնումներում դժվարությունների է հանդիպում, հենց այդ նպատակով առնվազն արտաքին քաղաքականության ոլորտում գործընթացը պետք է պարզեցնել։ Այդ մասին գերմանական Die Welt թերթում տպագրված հեղինակային հոդվածում գրել է Ավստրիայի կանցլեր Սեբաստիան Կուրցը։
«Եվրոպական միությունը պետք է ներդաշնակ խոսի եւ ձգտի նրան, ինչը Ժան Կլոդ Յունկերն անվանել է «համաշխարհային քաղաքականությանը պիտանի»։ Եվրոպական միության խորհրդի նախագահի իմ կես տարվա փորձը ցույց է տվել, որ մենք որոշումների կայացման ընթացքում մեծ խնդիրների առջեւ ենք կանգնում։ Այդ պատճառով մենք պետք է պարզեցնենք որոշումների ընդունումը, առաջին հերթին՝ արտաքին քաղաքականության ոլորտում»,- ասել է Կուրցը՝ հայտնում է ՏԱՍՍ-ը։
Ներկայում ԵՄ որոշումներն ընդունվում են միաձայնության սկզբունքով։ Վերջին ժամանակներս ձայների մեծամասնությամբ որոշումներ ընդունելու առաջարկով հանդես են եկել Եվրոպայի շատ քաղաքական գործիչներ, մասնավորապես՝ Եվրոպական հանձնաժողովի նախագահ Ժան Կլոդ Յունկերը, գերմանական խորհրդարանի ղեկավար Վոլֆգանգ Շոյբլեն, ԳԴՀ ՊՆ ղեկավար Ուրսուլա Ֆոն դեր Լյայենը։
