Ալբանիայի ընդդիմության կողմնակիցները երկրի կառավարության դեմ բողոքի ակցիաներ են անցակցնում՝ մեղադրելով նրան կոռուպցիայի եւ կազմակերպված հանցավորության հետ կապերի մեջ, հաղորդում է Associated Press-ը:
Ընդդիմադիր աջ ցենտրիստական Դեմոկրատական կուսակցության հազարավոր հետեւորդները շաբաթ հավաքվել են կառավարության շենքի դիմաց՝ պահանջելով երկրի վարչապետ, սոցիալիստ Էդի Ռամայի հրաժարականը:
Ընդդիմությունը, որի ներկայացուցիչները հրաժարվել էին խորհրդարանում իրենց տեղերից, հրաժարվում է բանակցել Ռամայի հետ եւ կառավարությանը կոչ է անում արտահերթ ընտրություններ անցկացնել:
Նշվում է, որ ԱՄՆ-ն եւ ԵՄ-ն ընդդիմությանը զգուշացրել էին չդիմել բռնությանը եւ բանակցել երկրի իշխանությունների հետ:
Հաղորդվում է, որ վերջին բողոքի ակցիաների ընթացքում տեղի են ունեցել բռնության դեպքեր, ոստիկանությունն արցունքաբեր գազ էր կիրառել:
Հաղորդվում է, որ Ալբանիան հույս ունի հունիսին հավանություն ստանալ ԵՄ-ի անդամակցության նպատակով բանակցությունների մեկնարկի համար: