Երկուշաբթի գիշերը Հոնկոնգի մետրոյում տեղի է ունեցել 2 դատարկ գնացքի բախում, տուժել են գնացքների մեքենավարները, հայտնում է RTHK-ն:
Վթարը տեղի է ունեցել քաղաքի գործարար կենտրոնի «Սենթրալ» կայարանի մոտ ստորգետնյա ուղու «կարմիր» ճյուղում՝ նոր ազդանշանային համակարգի թեստավորման ժամանակ: Բախման հետեւանքով գնացքներից մեկը ռելսերից դուրս է եկել, որի շարժակազմերը ծռմռվել են:
MTR երկաթուղային տրանսպորտի կորպորացիայի օպերատորը հայտնել է, որ պատահարի պատճառով օրվա ընթացքում «Սենթրալ» եւ «Էդմիրելթլի» կայարանների միջեւ «կարմիր» ճյուղով երթեւեկություն չի իրականացվի, որը Հոնկոնգ կղզին կապում է քաղաքի մայրցամաքային հատվածի հետ: Այս գծի մնացյալ հատվածներում գնացքները երթեւեկում են մեծացված միջակայքով: