«Ռեստարտ» նախաձեռնության անդամների և «Ես համալսարանական եմ» նախաձեռնության համակարգող, ՀՀ նախկին ոստիկանապետի խորհրդական Նարեկ Մալյանի միջև մարտի 4-ին տեղի ունեցած միջադեպի առթիվ մեղադրանք է առաջադրվել «Ռեստարտ»-ի ևս 4 անդամի։ Այս մասին NEWS.am-ին հայտնեց ՀՀ գլխավոր դատախազության հանրային կապերի բաժնի պետ Արևիկ Խաչատրյանը:

Նշենք, որ նախապես դեպքի կապակցությամբ հարուցվել էր քրեական գործ՝ ՀՀ ՔՕ ՔՕ 258–րդ հոդվածի 3–րդ մասի 1–ին կետի հատկանիշներով՝  մի խումբ անձանց կողմից խուլիգանություն կատարելը։

Ավելի ուշ գործը վերաորակավորվել էր եւ մեղադրանքն առաջադրվել է ՀՀ Քրեական օրենսգրքի 34-131-րդ հոդվածի 2-րդ մասի 1-ին կետով, այն է՝ առեւանգման փորձը։ Յուրի Ավագյանի, Հրաչյա Խլղաթյանի, Գարիկ Միսկարյանի, Արամայիս Պետրոսյանի նկատմամբ որպես խափանման միջոց է ընտրվել «ստորագրություն չհեռանալու մասին»։

Ավելի վաղ հայտնել էինք, որ նույն հոդվածով միջադեպի առթիվ մեղադրանք էր առաջադրվել «Ռեստարտ»-ի ևս 2 անդամների ՝ Դավիթ Պետրոսյանին և Դավիթ Սիմոնյանին։

Հիշեցնենք, որ մարտի 4-ին՝ կեսգիշերն անց, Նարեկ Մալյանը ֆեյսբուքյան ուղիղ հեռարձակման միջոցով հայտնեց, որ «Ռեստարտ» նախաձեռնության անդամները հարձակվել են իր վրա, 10 հոգով մոտեցել և փորձել են քաշքշել ու ճանկռել, իսկ մի քանի րոպե անց մոտեցել են ոստիկանության աշխատակիցներն ու միջադեպի բոլոր մասնակիցներին բերման ենթարկել Կենտրոնի ոստիկանություն: Նարեկ Մալյանը քրեական գործով տուժող է ճանաչվել։

Նարեկ Մալյանի հետ կապված միջադեպի գործով «Ռեստարտ»–ի երկու անդամների նկատմամբ խափանման միջոց է ընտրվել