Մարդու իրավունքների պաշտպանության ոլորտում Կառավարության գործողություններում ամենամեծ ձեռքբերումը կարելի է համարել անցյալ տարի անցկացված ընտրությունները, որոնք ամենաթափանցիկն էին եւ ձեռք բերեցին ժողովրդի վստահությունը:
Մարտի 21-ին մարդու իրավունքների պաշտպանության եւ հանրային հարցերի մշտական խորհրդարանական հանձնաժողովի նիստում այս մասին հայտարարեց արդարադատության նախարար Արտակ Զեյնալյանը՝ ներկայացնելով բարեփոխումների գործընթացը:
Նախարարի հավաստմամբ՝ երկրում ժողովրդավարության տեսանկյունից լուրջ փոխակերպումներ են արձանագրվել, սակայն դեռ կան խնդիրներ, որոնք պետք է լուծվեն: Զեյնալյանը նշեց, որ 2017 թվականին նախորդ իշխանությունները ընդունեցին 2017-2019թթ. Մարդու իրավունքների պաշտպանության ազգային ռազմավարության գործողությունների ծրագիր` երկրում մարդու իրավունքների պաշտպանության ընդհանուր քաղաքականություն իրականացնման համար:
Արդարադատության նախարարն ընդգծեց, որ մարդու իրավունքների ապահովումն ու պաշտպանությունը ժողովրդավարական եւ իրավական պետության առաջնահերթություններից մեկն են: «Ուզում եմ նշել, որ սա ամրագրված է մեր Սահմանադրությունում եւ Կառավարության անցյալ տարվա ծրագրում», - նշեց Արտակ Զեյնալյանը:
