Ավշար գյուղի միջնակարգ դպրոցի ուսուցիչներն ու աշակերտներն այսօր՝ մարտի 21-ին եղել են կառավարությունում, վարչապետ Նիկոլ Փաշինյանին փոխանցել նամակներ, և հանդիպել աշխատակազմի հետ՝ տնօրեն Հերմինե Անդրեասյանի հրաժարականի պահանջով։
«Հետո գնացել ենք նախագահական նստավայր, այնտեղ հանդիպել ենք աշխատակազմի անդամներից մեկի հետ, և կրկին փոխանցել նամակներ։ Նախագահին ենք հասցրել մեր բողոքը։ Մեզ հետ էին ծնողներ, ուսուցիչներ և բարձր դասարանի աշակերտներ»,- NEWS.am-ին այս մասին հայտնեց դպրոցի փոխտնօրեն Ռեգինա Սիմոնյանը։
Հիշեցնենք՝ արդեն ավելի քան մեկ շաբաթ է, ինչ Ավշար գյուղի միջնակարգ դպրոցի դասապրոցեսը խաթարված է։ Արարատի մարզի Ավշար գյուղի դպրոցում իրավիճակը առայժմ մնում է լարված։ Մոտավորապես 500 աշակերտ այս պահին դասադուլ է իրականացնում։ Ուսուցիչները, աշակերտների ծնողները պահանջում են տնօրեն Հերմինե Անդրեասյանի հրաժարականը՝ նրան մեղադրելով կադրային խտրականության և անհարգալից վերաբերմունքի համար։