2015 թվականին Հայաստանում մեկնարկած «Օրգանական գյուղատնտեսության աջակցության» ծրագրի իրականացումը մարտի 22-ին ավարտվել է:
Ծրագիրը ֆինանսավորվել է Եվրոպական միության եւ Ավստրիայի Զարգացման Գործակալության (ODA) կողմից եւ իրականացվել է ՀՀ գյուղատնտեսության նախարարության հետ սերտ համագործակցությամբ:
Ծրագրի նպատակն էր տեխնիկական եւ ֆինանսական աջակցություն ցուցաբերել ֆերմերներին, գյուղատնտեսությամբ զբաղվող ագրոբիզնեսի ներկայացուցիչներին, գյուղատնտեսական արտադրության ծավալների ավելացումը, նոր միջազգային շուկաների յուրացումը եւ տեղական շուկան բիոարտադրանքով ապահովելը:
Ծրագիրը բաղկացած է չորս բաղադրիչներից` իրավական դաշտի բարեփոխում, ֆերմերներին ֆինանասական օգնության (դրամաշնորհներ) տրամադրում, շուկաներ մուտք գործելու ապահովում, օրգանական գյուղատնտեսության առավելությունների մասին տեղեկացվածության բարձրացում:
Ծրագրի ավարտին զուգահեռ իր գործունեությունն է վերսկել Ձորաղբյուրում (Կոտայքի մարզ) Ուսումնական կանաչ կենտրոնը եւ այդպիսի կենտրոն է բացվել նաեւ Արչիսում (Տավուշի մարզ), որին նոր տեխնիկա, գործիքներ եւ սարքավորումներ են տրամադրվել:
Հայաստանի քոլեջներում ներդրվել է ուսումնական ծրագիր ապագա մասնագետների ուսուցման համար: Նաեւ ուղղակի ներդրումներ են կատարվել օրգանական ապրանքների արտադրության եւ առեւտրի ոլորտում օրենսդրական բազայի բարելավման ուղղությամբ:
Ծրագրի փակման արարողությանը բացման խոսքով հանդես եկավ Հայաստանում ԵՄ պատվիրակության ղեկավար, դեսպան Պյոտր Սվիտալսկին:
«Եվրոպական միությունը աջակցում է Հայաստանի գյուղատնտեսությանը` որպես տնտեսության հիմնական ոլորտներից մեկը, որն ապահովում է երկրի ՀՆԱ-ի 25 տոկոսը եւ աշխատուժի 36 տոկոսը: Օրգանական գյուղատնտեսությունը կարող է նոր նշաձող դառնալ Հայաստանի համար, ինչը համապատասխանում է տեղական համատեքստին` նախապատվություն տալով բարձր որակին:
Ծրագիրը նպաստել է Հայաստանում գյուղատնտեսության կայուն զարգացման ռազմավարության իրականացմանը՝ աջակցելով օրգանական գյուղատնտեսության եւ այլ իրավական ակտերի մասին օրենքի վերանայմանը:
Ծրագրի շրջանակում իրականացվող միջոցառումներից են օրգանական խորհրդատվական ծառայությունների խթանումը, օրգանական արտադրության մասին իրազեկության բարձրացումը, օրգանական ապրանքների համար շուկաների հասանելիության բարձրացումը եւ գյուղատնտեսության բնագավառում կրթության խթանումը», - ասաց Սվիտալսկին:
Առաջին օրգանական գյուղատնտեսության աջակցության ծրագիրը Հայաստանում սկսվել է 2015 թվականին, դրա տեւողությունը 3 տարի է, իսկ բյուջեն` 25 մլն եվրո: Երկրորդ օրգանական գյուղատնտեսության աջակցության ծրագրի տեւողությունը 37 ամիս է, բյուջեն` 3.3 մլն եվրո, որից 2,8 մլն եվրոն տրամադրում է Եվրամիությունը, իսկ 0,5 մլն եվրոն՝ Ավստրիայի զարգացման գործակալությունը:
Ծրագրով 45 շահառու ֆերմերներին եւ վերամշակողներին տրամադրվել է 1 միլիոն եվրո` օրգանական արտադրության մեկնարկի կամ ընդլայնման համար: Միջազգային ցուցահանդեսներին մշտական մասնակցության արդյունքում արտահանվել է 0.5 մլն եվրո չափով ապրանք:
Ծրագրի շահառուները սերտիֆիկացված օրգանական արտադրանք են ցուցադրել Կենտրոնի օրգանական արտադրանքի խանութում:
Հարավային Կովկասում Ավստրիայի Զարգացման Գործակալության գրասենյակի ղեկավար Հերարդ Շաումբերգերը նշեց, որ շուտով իրենց աջակցությամբ կսկսվի «Կանաչ գյուղատնտեսություն» ծրագիրը: Ծրագրի բյուջեն 11.7 մլն եվրո է:
