ԵՏՄ-ին Հայաստանի անդամակցությունից հետո հանրապետության Կենտրոնական բանկը մի կողմ չի քաշվել նոր գործընթացներից։ Այս մասին ապրիլի 2-ին խորհրդարանի տարածաշրջանային հարցերի եւ եվրասիական ինտեգրման մշտական հանձնաժողովի նիստում ասել է Հայաստանի Կենտրոնական բանկի փոխնախագահ Վախթանգ Աբրահամյանը։
Նրա խոսքով՝ ԿԲ-ն համագործակցում է այդ ինտեգրացիոն միավորման տարբեր կառույցների հետ, ինչպես նաեւ ներգրավված է այն հարթակներում, որոնք ստեղծվել են ԵՏՄ անդամ երկրների կենտրոնական բանկերի կողմից՝ տնտեսական միության շրջանակում փոխգործակցության արդյունավետության բարձրացման եւ ամրապնդման համար։ «Այս առումով Հայաստանի Կենտրոնական բանկը գտնվում է առաջատար դիրքերում, քանի որ ստացել է բազմաթիվ բարձր գնահատականներ ինչպես միջազգային կառույցներից, այնպես էլ փորձագետներից, որոնք կանոնավորապես մոնիթորինգ են իրականացնում։ Նրանց գնահատականները վկայում են մեր Կենտրոնական բանկի բավական արդյունավետ աշխատանքի մասին»,- հավաստիացրել է Աբրահամյանը։
