Կենտրոնական բանկի կարծիքով՝ Հայաստանի տարածքում ֆինանսական ծառայությունների մատուցման ոլորտը պետք է կարգավորված լինի։ Այս մասին ապրիլի 2-ին խորհրդարանի տարածաշրջանային հարցերի եւ եվրասիական ինտեգրման մշտական հանձնաժողովի նիստում, ԵՏՄ-ում միասնական ֆինանսական շուկայի ձեւավորման մասին Հայաստանի Կենտրոնական բանկի զեկույցի ներկայացման ժամանակ, ասել է ԿԲ փոխնախագահ Վախթանգ Աբրահամյանը՝ պատասխանելով հանձնաժողովի նախագահ, «Բարգավաճ Հայաստան» խմբակցության պատգամավոր Միքայել Մելքումյանի հարցին։

Նրա խոսքով՝ այս ոլորտում անհրաժեշտ է հրաժարվել այսպես կոչված «պարզեցված արտոնագրերի» տրամադրումից։ Ընդ որում՝ ԿԲ ներկայացուցիչը կարծում է, որ փոխանակման կետերը կարող են, եւ որոշ առումով, պետք է տեղակայվեն հյուրանոցների տարածքում, որտեղ բնակություն են հաստատում այդ թվում նաեւ զբոսաշրջիկները։ Սակայն ԿԲ փոխնախագահը տարակուսանք հայտնեց, թե ինչ պատճառով են այդ փոխանակման կետերը գտնվում փողոցներում (վերջին 30 տարիներին- խմբ.), ընդ որում՝ մեծ քանակությամբ եւ իրար բավական մոտիկ։ «Ինձ այնքան էլ հասկանալի չէ, թե մեր տնտեսության որ սեգմենտն են նրանք սպասարկում։ Գուցե որոշակի իմաստով նրանք սպասարկում են նաեւ նրա ստվերային մասը»,- ասաց նա։ Անդրադառնալով գրավատների ծառայություններին՝ Աբրահամյանը կարծիք հայտնեց, որ նրանց ծառայություններն այնքան էլ չեն բխում բնակչության շահերից, քանի որ վարկեր են տրամադրում չափազանց բարձր տոկոսներով։