Հարցաքննվել եմ, այդ թվում այս դատարանում։ Այս մասին այսօր՝ ապրիլի 3–ին Երևանի ընդհանուր իրավասության դատարանի Շենգավիթի նստավայրում հայտարարեց ՀՀ վարչապետ Նիկոլ Փաշինյանը՝ պատասխանելով հարցին, թե արդյոք ինքը հարցաքննվե՞լ է «Մարտի 1-ի» գործի շրջանակներում: Վարչապետի պատասխանից, սակայն չհասկացվեց, թե երբ է նա հարցաքննվել՝ Մարտի մեկի իրադարձություներից հետո մեղադրյալի կարգավիճակու՞մ, թե՞ վարչապետի պաշտոնը ստանձնելուց հետո՝ 2018թ. հարուցված Մարտի մեկի գործով սահմանադրական կարգը տապալելու գործի շրջանակներում։
Հիշեցնենք, որ Մարտի մեկի իրադարձություններից հետո առաջին նախագահ Լևոն Տեր֊Պետրոսյանի կողմնակիցներից տասնյակ մարդիկ ազատազրկման դատապարտվեցին, այդ թվում ներկայիս վարչապետ Նիկոլ Փաշինյանը, ով 1,5 տարի ընդհատակում մնալուց հետո հանձնվեց ոստիկանությանը, դատապարտվեց 7տարվա ազատազրկման, և 2 տարի նստելուց հետո համաներմամբ ազատվեց։
Նշենք, որ «Մարտի 1-ի» գործով սահմանադրական կարգը տապալելու գործի շրջանակներում հարցաքննվել են նաև Հայաստանի առաջին և երրորդ նախագահները, իսկ երկրորդ նախագահ Ռոբերտ Քոչարյանը նույն գործի շրջանակներում կալանավորված է։
