YouTube-ը կզբաղվի ինտերակտիվ շոուի ստեղծմամբ։ Ինչպես տեղեկացնում է Bloomberg-ը, դրա համար պատասխանատու է ընկերության հատուկ բաժանմունքը, որը կգլխավորի Բեն Ռելերսը, տեղեկացնում է ՏԱՍՍ-ը։

Գործակալության տվյալներով՝ Ռելերսն աշխատում է YouTube-ում ութ տարի եւ մինչ այդ զբաղվել է իմպրովիզացիոն ծրագրերի ստեղծմամբ։

«Հիմա մենք նոր զարմանալի գործիքներ ունենք եւ հնարավորություններ բազմաշերտ ու ինտերակտիվ պատմություններ ստեղծելու համար»,- կարծում է YouTube-ի բաժանմունքի ղեկավար Սյուզան Դենիելսը, որը զբաղվում է էքսկլյուզիվ կոնտենտի արտադրությամբ։

Bloomberg-ը ուշադրություն է հրավիրում այն բանին, որ YouTube-ը մրցակից ունի, որն աշխատում է այդ ձեւաչափում՝ Netflix-ը։ Ընկերությունն արդեն մի քանի ինտերակտիվ մանկական շոուներ է ստեղծել, իսկ 2018-ի դեկտեմբերին տեղի է ունեցել «Սեւ հայելի. Բրանդաշմիգ» ինտերակտիվ ֆիլմի պրեմիերան, որում հանդիսատեսները կարող էին ազդել սյուժեի զարգացման վրա՝ ընդունելով որոշումներ գլխավոր հերոսի փոխարեն։ Ավելի վաղ տեղեկացվել էր Netflix-ի՝ ապրիլին ինտերակտիվ ընտանեկան «Դու ընդդեմ վայրի բնության» շոուի պլանների մասին՝ բրիտանացի ճանապարհորդ, հեռուստավար եւ փորձագետ Բեար Գրիլսի հետ։