Մենք այսօր քննարկումների մեջ ենք, թե արդյոք մեզ համար կարող է ընդունելի լինել առանց մեղադրական դատավճռի գույքի բռնագրավման ինստիտուտի ներդրումը: Այս մասին այսօր՝ ապրիլի 11-ին, ԵԽԽՎ-ում հարցերին պատասխանելիս նշեց ՀՀ վարչապետ Նիկոլ Փաշինյանը:
Նրա խոսքով, այս թեմայի հետ կապված Հայաստանում կան բավական լուրջ մտահոգություններ, նաեւ նախկին իշխանությունների ներկայացուցիչների շրջանում:
«Շատ կարեւոր եմ համարում արձանագրել, որ սա ոչ միայն միջազգայնորեն ընդունված պրակտիկա է, այլեւ 2015-ից գտնվում է՝ ՀՀ-ի ստանձնած միջազգային պարտավորությունների շրջանակում, այդ թվում ԵԽ-ի առջեւ: Այդ մեխանիզմի մասին հիշատակում կա հանցավոր ճանապարհներով ստացված եկամուտների լվացման, հետախուզման, առգրավման, բռնագրավման եւ ահաբեկչության դեմ պայքարի ֆինանսավորման դեմ պայքարի մասին ԵԽ-ի կոնվենցիայում, կոռուպցիայի դեմ ՄԱԿ-ի կոնվենցիայում, եւ ըստ էության, այս մեխանիզմի վերաբերյալ Հայաստանը որոշակի պարտավորություններ է ստանձնել ԵԽ Մանիվալ հանձնախմբի կողմից 2015-ին»,-ասաց վարչապետը:
Նա ընդգծեց, որ անձամբ իր կարծիքով, դա մի մեխանիզմ է, որ կարող է եւ պետք է իսկապես կյանքի կոչվի Հայաստանում. «Բայց Հայաստանը ժողովրդավարական երկիր է, այստեղ որոշումները միանձնյա չեն կայացվում, սրա վերաբերյալ պետք է ունենանք լայն քննարկումներ եւ այդ քննարկումների արդյունքում պիտի կայացնենք որոշում: Շատ օգտակար կլինի այս հարցում ԵԽ-ի հետ մեր համագործակցությունը, որպեսզի, քավ լինի, համկարծ սա չփորձի մեկնաբանել կամ օգտագործել որպես հետապնդումների գործիք, որովհետեւ այդ էջը մեր երկրում անշրջելիորեն փակված է»,-իր խոսքն ամփոփեց Փաշինյանը: