Կանանց հանդեպ հրապարակային ոտնձգությունն Արգենտինայում դարձել է հանցագործություն, համապատասխան օրենքը միաձայն ընդունվել է երկրի սենատում, տեղեկացնում է ՌԻԱ «Նովոստի»-ն։

Խոսքը, մասնավորապես, սեռական բնույթի մեկնաբանությունների, լուսանկարների եւ տեսանյութերի մասին է, որոնք արվել են առանց կնոջ համաձայնության, կանանց հետապնդումների կամ անպարկեշտ ժեստերի մասին, որոնք կարող են արվել փողոցներում, տրանսպորտում, առեւտրային կենտրոններում, հրապարակային այլ վայրերում։

Այդ գործողությունների համար կարգախախտին կարող են տուգանել, հարկադիր աշխատանքի ուղարկել կամ ձերբակալել։

Կանանց ազգային ինստիտուտը կստեղծի հատուկ թեժ գիծ հրապարակային վայրերում ոտնձգության ենթարկված կանանց օգնելու համար։

Արգենտինայում, ինչպես նաեւ Լատինական Ամերիկայի մի շարք այլ երկրներում, կանանց հանդեպ բռնության դեմ պայքարը իշխանությունների կարեւոր խնդիրներից մեկն է։ Երկրում գործում է ֆեմինիստական շարժում, որը հարյուրավոր մարդկանց է հավաքում հանրահավաքներում։ Բուենոս Այրեսի փողոցներում հաճախ կարելի է տեսնել կանանց մանուշակագույն կամ կանաչ գույնի շարֆերով կամ գլխաշորերով։ Առաջինը խորհրդանշում է պայքարը բռնության դեմ, երկրորդը՝ հղիության արհեստական ընդհատման համար։

 MuMaLa շարժման տվյալների համաձայն, որը հանդես է գալիս կանանց պաշտպանությամբ, գեղեցիկ սեռի ներկայացուցիչների գրեթե 100 տոկոսը հայտարարել է, որ ենթարկվել է հրապարակային ոտնձգության։ Նրանց կեսը վկայել է անպարկեշտ արտահայտությունների մասին, 47 տոկոսը՝ հետապնդումների։