ԱՄՆ նախագահ Դոնալդ Թրամփը, նրա ընտանիքի անդամները եւ Trump Organization ընկերությունների խումբը հայց են ներկայացրել ընդդեմ Deutsche Bank բանկի եւ Capital One ընկերության, հայտնում է NBC News-ը:
Ավելի վաղ ԱՄՆ Ներկայացուցիչների պալատի հետախուզության եւ ֆինանսական ծառայությունների կոմիտեները ծանուցմամբ տեղեկություններ էին պահանջել նախագահ Դոնալդ Թրամփի ֆինանսների եւ Ռուսաստանի բանկերի հետ բիզնեսի վերաբերյալ: Ծանուցումը ստացած բանկերի թվում են Citigroup-ը, Bank of America-ն JPMorgan Chase-ը, ինչպես նաեւ Deutsche Bank-ը, որը 2 տասնամյակ Թրամփի հետ բիզնես է վարել:
Հեռուստաալիքի տեղեկություններով՝ հայցն ուղարկվել է Նյու Յորք նահանգի Հարավային շրջանի դատարան, որպեսզի Deutsche Bank-ին եւ մյուս բանկերին թույլ չտան հայցվորների ֆինանսների մասին տեղեկություններ տրամադրել ԱՄՆ Կոնգրեսին եւ արգելափակեն ֆինանսական հաստատություններին ուղարկված ծանուցումները: