Հայաստանում այս տարվա առաջին երեք ամիսներին արտահանումը կրճատվել է 8,6 տոկոսով. նվազում արձանագրած ցուցանիշներից մի քանիսը վերաբերում են լեռնահանքային ոլորտին: Այս մասին, այսօր՝ մայիսի 3-ին, լրագրողների հետ հանդիպման ժամանակ նշել է Տնտեսական զարգացման եւ ներդրումների նախարար Տիգրան Խաչատրյանը:
Նրա խոսքով, լեռնահանքային ոլորտում արտահանումը առաջին եռամսյակում նվազել է 51 մլն դոլարի չափով, որից 21 մլն դոլարը խտանյութերի նվազումն է: Նվազումը կապված է նաեւ այս ոլորտում սեզոնայնության հետ:
Նախարարը կանխատեսեց, որ տարվա կտրվածքով այս ոլորտում կունենանք նույնպիսի ցուցանիշ, որն ունեցել ենք նախորդ տարի, կամ մի փոքր ավելի, թեեւ եղել է գների նվազում:
«Էլեկտրաէներգիայի արտահանումն է կրճատվել առաջին եռամսյակում նախորդ տարվա համեմատ: Սա եւս սեզոնայնության հետ կապ ունի: Ծխատոտի արտահանման գծով մի փոքր նվազում ունենք, սակայն կա հավաստիացում, որ մյուս ամիսներին բացը կլրացվի: Ալյումինե փայլաթիթեղի արտահանումն է որոշակի նվազում ունեցել, որը պայմանավորված է նրանով, որ միջազգային շուկայում ռուսական արտադրողի նկատմամբ որոշակի սահմանափակումներ էին կիրառվում: Այդ թվում «Արմենալը», որ արտահանում ուներ եվրոպական շուկաներ, ժամանակավոր դժվարություններ է ունեցել: Հիմա արդեն խնդիրը հանգուցալուծված է եւ արդեն մարտին եղել է աճ: Տարվա կտրվածքով նախատեսվում է 22-25 տոկոս արտադրանքի ծավալների աճ նախորդ տարվա համեմատ»,ասաց Տիգրան Խաչատրյանը:
«Այսինքն թեեւ ունեցել ենք արտահանման 8 տոկոսից ավելի նվազում, սակայն հավատում ենք, որ տարին կամփոփվի որոշակի աճով: Ծրագրով նախատեսված է այս տարի արտահանման 7-8 տոկոս աճ, կլինի կամ այդքան, կամ դրա շուրջ»,-ասաց նա՝ հավելելով. «Մտահոգությունների առիթ այս փուլում չենք տեսնում»:
