Նյու Յորքի դատարանը Աննա Սորոկինային, որը վերջին տարիներին հայտնի է Դելվի ազգանվամբ եւ որը ներկայացել է որպես գերմանացի հարուստի ժառանգորդուհի՝ 60 մլն եվրո կարողությամբ, դատապարտել է 4 տարվա ազատազրկման, տեղեկացնում է BBC-ն։

Նա բանտում կանցկացնի չորս տարի, ինչից հետո ժամկետը կարող են փոխել պայմանականի։ Կարող են նաեւ արտաքսել Գերմանիա։

28-ամյա Սորոկինա-Դելվիին մեղադրել են ավելի քան 200 հազար դոլար հափշտակելու մեջ ֆինանսական հաստատություններից, շքեղ հյուրանոցներից եւ իր ծանոթներից։ Քննության տվյալներով՝ նա պարտքով ապրում էր թանկարժեք հյուրանոցներում, ընթրիքներ կազմակերպում ընկերների համար եւ չէր վճարում հաշիվները՝ կեղծելով չեքերն ու օգտագործելով գոյություն չունեցող փաստաթղթեր։ Ըստ դատախազների՝ Դելվին այդ հանցագործությունները կատարել է 10 ամսվա ընթացքում, այսինքն՝ 2016-ի նոյեմբերից մինչեւ 2017-ի օգոստոս։ Ապրիլի վերջին նրան մեղավոր են ճանաչել խարդախության մեջ։

Սորոկինան նաեւ պետք է վճարի 24 հազար դոլար տուգանք եւ վերադարձնի տուժածներին մոտ 199 հազար դոլար։

Աննա Սորոկինա-Դելվին 28 տարեկան է, ծնվել է Ռուսաստանում, բայց 2007-ին ծնողները կրտսեր եղբոր հետ տարել են Գերմանիա։ Չորս տարի անց Աննան ավարտել է միջնակարգ դպրոցը Քյոլնից 60 կիլոմետր հեռու գտնվող Էշվայլեր փոքրիկ քաղաքում։

Նա Նյու Յուրք է մեկնել 2016 թվականին եւ հաջող ներգրվել գլամուր ընկերակցությունում, որտեղ հաջողությամբ ներկայացել է որպես գերմանացի նավթային մագնատի, դիվանագետի կամ պարզապես հարուստի աղջիկ։

Իրականում նրա հայրը, ԶԼՄ-ների տեղեկությամբ, սկզբում Գերմանիայում բեռնատարի վարորդ է աշխատել, իսկ հետո օդորակիչ սարքերի սպասարկման ոչ մեծ ընկերություն է ձեռք բերել։