Ծառուկյանին մանդատից զրկելուց բացի երկրում լիքը այլ խնդիրներ կան։ Այս մասին մայիսի 10-ին լրագրողների հետ հանդիպմանն ասել է «Բարգավաճ Հայաստան» խմբակցության պատգամավոր Գեւորգ Պետրոսյանը։
Նրա խոսքով՝ դատական համակարգի խնդիրները, աղքատությունը, կոռուպցիան դեռեւս ակտուալ են երկրում, եւ պետք է մտածել այն մասին, թե ինչպես լուծենք դրանք։ «Իշխանությունները խոսում են համակարգային կոռուպցիան արմատախիլ անելու մասին, միեւնույն ժամանակ մենք տեսնում ենք, որ ձերբակալվել է առողջապահության փոխնախարարը, իսկ Պետական վերահսկողական ծառայության ղեկավարին մեղադրանք է ներկայացված։ Դատական համակարգի խնդիրն այն է, որ մենք տեսնում ենք, որ վարվում են քրեական գործեր նախկին բարձրաստիճան պաշտոնյաների հանդեպ, բայց դատարանի վճիռը չգիտես ինչու ձգձգվում է»,- նշել է նա։
Պատգամավորը նկատել է, որ երբ խոսվում է Հայաստանում արտոնյալ մարդկանց բացակայության մասին, վերջին ժամանակներս քննարկվում է միայն Գագիկ Ծառուկյանի անունը։ «Պետք է հասկանալ, որ մեր կուսակցության ղեկավարը չի ձգտում, որպեսզի պահպանի իր մանդատը անձնական նպատակներով, քանի որ դա, ըստ էության, պետք չէ»,- ամփոփել է Գեւորգ Պետրոսյանը։
Նշենք, որ անցած շաբաթ «Քաղաքացու որոշում» կուսակցությունը Հայաստանի գլխավոր դատախազ Արթուր Դավթյանին եւ խորհրդարանի նախագահ Արարատ Միրզոյանին էր ուղարկել հայտարարություն, որում խնդրում էր քրեական հետապնդում սկսել «Բարգավաճ Հայաստան» կուսակցության առաջնորդի դեմ, որը պատգամավոր լինելով՝ զբաղվում է ձեռներեցությամբ, ինչը հակասում է օրենքին։ Կուսակցության ներկայացուցիչները խնդրում են պարզել այս գործը, եւ եթե այդ կասկածները հաստատվեն, Ծառուկյանին զրկել մանդատից։