Ճապոնիայի կայսր Նարուհիտոն հույս է հայտնել, որ ԱՄՆ-ն եւ ճապոնիան կշարունակեն ամրապնդել երկկողմ հարաբերությունները եւ իրենց ներդրումը կունենան մոլորակի խաղաղության հաստատման եւ բարգավաճման գործում: Այդ մասին նա հայտարարել է պալատում իր ողջույնի խոսքում, որտեղ երեկոյան ԱՄՆ նախագահ Դոնալդ Թրամփի եւ նրա տիկնոջ՝ Մելանիայի այցի կապակցությամբ կազմակերպվել էր հանդիսավոր ընդունելություն, հաղորդում է ՏԱՍՍ-ը:
«Ճապոնիայի անդամակցությունը միջազգային հանրությանը մեկուսացման ժամանակաշրջանից հետո սկսվել է 1854-ին ԱՄՆ-ի հետ համաձայնագրի ստորագրումից:
Այդ ժամանակվանից Ճապոնիան եւ ԱՄՆ-ն, ինչպես նաեւ նրանց ժողովուրդները տարբեր դժվարություններ են հաղթահարել, ամրապնդել փոխհամաձայնությունը եւ վստահությունը եւ այժմ նրանց կապում են ամուր բարեկամական կապերը: Ես անկեղծորեն հույս ունեմ, որ մեր երկրները իրենց ներդրումը կունենան մոլորակի խաղաղության հաստատման եւ բարգավաճման գործում», - ասել է միապետը:
Սպիտակ տան ղեկավարն, իր հերթին, ասել է, որ նրա համար մեծ պատիվ է կայսրի մոտ ընդունելության արժանանալ, որը մայիսի 1-ին զբաղեցրել է գահը:
«Ես անկեղծորեն աղոթում եմ, որ Ռեյվի դարաշրջանը կայսերական մեծության, նրա ընտանիքի եւ ողջ Ճապոնիայի ժողովրդի համար խաղաղության եւ բարգավաճման ժամանակաշրջան լինի», - ասել է նախագահը:
Մայիսի 25-ին Թրամփը պետական այցով ժամանել է Ճապոնիա:
