Մուտիլովկաներ մի արեք, թե արգելել ենք: Այս մասին, այսօր՝ հունիսի 4-ին, ԱԺ-ում լրագրողների հետ զրույցում նշեց ԲՀԿ խմբակցության ղեկավար Գագիկ Ծառուկյանը՝ անդրադառնալով դիտարկմանը, որ ԲՀԿ խմբակցության պատգամավոր Վարդան Ղուկասյանին արգելել է կարծիք հայտնել:
«Ամեն մարդ իրավունք ունի իր կարծիքը ասելու: Բայց եթե հարց կա, որը մենք պետք է խմբակցությունով քննարկենք, նոր ընդհանուր մեր թիմի կարծիքը ասելու: Բոլորն էլ մարդ են, բոլորն էլ իրավունքներ ունեն, բայց եթե որոշում կա թիմի անունից ասելու, պետք է մենք բոլորս հավաքվենք, քննարկենք, նոր միասնական ասենք»,-ասաց Ծառուկյանը:
Հիշեցմանը, որ երեկ ասել է, որ նկատողություն է արել Վարդան Ղուկասյանին, Ծառուկյանն արձագանքեց. «Ոչ մի բան էլ չենք արել»:
Հիշենենք, սակայն, որ նախօրեին գագիկ Ծառուկյանը՝ անդրադառնալով ԲՀԿ խմբակցության պատգամավոր Վարդան Ղուկասյանի հայտարարությանը, որտեղ նա Ռոբերտ Քոչարյանի ազատությունն էր պահանջել, ասել էր հետեւյալը. «Բոլորին զգուշացված է եղել, որ որեւէ մեկը անհատական կարծիք ասելու իրավունք չունի»:
Հարցին, թե ինչպես է գնահատում Վարդան Ղուկասյանի այդ հայտարարությունը, իրավունք ունե՞ր նման հայտարարություն անելու, ԲՀԿ առաջնորդը պատասխանել էր. «Դրա համար ես այսօր հրավիրել էի նիստ, որի ժամանակ բոլորին զգուշացված է եղել, որ որեւէ մեկը անհատական կարծիք ասելու իրավունք չունի: Խմբակցություն է, որտեղ պետք է քննարկվի եւ ընդհանուր որոշումը ոնց լինի, այդպես հայտարարություն անի»:
