Իհարկե, այս մեկ տարում ստվերի կրճատում եղել է, բայց դա չափելի չէ: Այս մասին այսօր՝ հունիսի 7-ին, ԱԺ-ում լրագրողների հետ զրույցում նշեց ՊԵԿ նախագահ Դավիթ Անանյանը:
Նրա խոսքով, իրենք ունեն ներքին գնահատականներ, որոնք չէր ցանկանա հնչեցնել հանրության առաջ. «Որովհետեւ մենք հանրությանը պետք է ներկայանանք ավելի հիմնավորված հաշվարկներով: Հիմա մենք այդ հիմնավոր հաշվարկների համակարգերն ենք կայացնում»:
ՊԵԿ նախագահն ասաց, որ ստվերի չափման ճշգրիտ գործիքակազմ չկա, կան դատողություններ. «Նույնիսկ ազգային վիճակագրական ծառայությունը երբ որ չհաշվառվող տնտեսության վերաբերյալ տալիս է որոշակի դատողություններ եւ տեղեկատվություն, ինքը դա անում է իր գործիքակազմով ձեռք բերված հարցումների միջոցով, մոտավորության որոշակի տոկոսի շրջանակներում: Հիմա մենք ուզում ենք ունենալ ավելի ճշգրիտ տոկոսի հաշվարկ: Քանի դեռ դա չունենք, ազնվորեն ասում ենք, որ չունենք: Բայց ոլորտային ստվերների գնահատական մեր ներքին գործընթացների համար իհարկե ունենք: Ամեն ոլորտում յուրաքանչյուր տնտեսվարողի կողմից դրսեւորած վարքագծի գնահատականն էլ ունենք»,-ասաց ՊԵԿ նախագահը:
Հարցին, թե ո՞ր ոլորտում է ամենաշատ ստվերը, Անանյանը պատասխանեց. «Հիմնականում ծառայությունների ոլորտում, ավելի շատ մանրածախ առեւտրում: Թաքցնում են շրջանառությունները, հարկման բազաները:
Ինչքան միջինից դեպի խոշոր ենք գնում, ստվերի գնահատականն ավելի քիչ է, քան մանրի մոտ: Փոքրներն ու մինչեւ միջինները շատ ավելի ստվերի մեջ են, ուղղակի արդյունքային առումով նրանց ազդեցությունն այդքան շատ չի»: