Հյուսիսային Կորեայի առաջնորդի խորթ եղբայր Կիմ Չեն Նամը, որը 2017 թվականին սպանվել էր Մալայզիայի օդանավակայանում, եղել էր ԱՄՆ ԿՀՎ իրազեկիչը եւ մի քանի անգամ հանդիպել է նրա աշխատակիցների հետ, հայտնում է Wall Street Journal պարբերականը:
«Ամերիկյան հետախուզական գործակալության եւ պարոն Կիմի միջեւ կապ է եղել»,- տեղեկացնում է պարբերականը՝ վկայակոչելով իր աղբյուրին:
Պարբերականի տեղեկություններով՝ Կիմ Չեն Նամը 2017 թվականի փետրվարին ուղեւորվում էր Մալայզիա՝ ԿՀՎ-ից իր կապավորին հանդիպելու համար: Նա մի քանի օր է անցկացրել նաեւ Լանգկավի հանգստավայրում, որտեղ հանդիպել է կորեա-ամերիկյան ծագմամբ անհայտ տղամարդու հետ, ինչի մասին ոստիկանությունը հայտնել էր Կիմ Չեն Ընի եղբոր սպանության մեջ մեղադրվող կանանց դատավարության ժամանակ:
Մի շարք ամերիկացի նախկին պաշտոնատար անձինք հայտարարել էին, որ «հիմնականում չինական անկլավ Մակաոյում ապրող պարոն Կիմը, հավանաբար, շփումներ ուներ այլ պետությունների անվտանգության ծառայությունների հետ, հատկապես Չինաստանի», նշում է պարբերականը:
Ավելի վաղ ՄԱԿ-ում ԱՄՆ մշտական ներկայացուցիչը հայտարարել էր, որ Կիմ Չեն Ընի եղբորը սպանել են ՌԴ-ի «օժանդակությամբ»:
Հիշեցնենք, որ Կիմ Չեն Նամը մահացել է 2017 թվականի փետրվարի 13-ին Կուալա-Լումպուրի օդանավակայանից հիվանդանոց տեղափոխելու ճանապարհին: Ոստիկանության հաղորդմամբ՝ նա գանգատվել է ուժեղ գլխապտույտից՝ պատմելով, որ ինչ-որ մեկն իր դեմքին անհայտ հեղուկ է ցողել, որից հետո փախուստի է դիմել: Մալայզիայի իշխանությունները հայտարարել էին, որ մահը վրա է հասել արգելված նյարդակաթվածահարող VX նյութի ազդեցության հետեւանքով, որն արգելված է քիմիական զենքի մասին միջազգային կոնվենցիայով: Հանգուցյալի մոտ գտել էին դիվանագիտական անձնագիր Կիմ Չհոլ անվամբ, բայց Հարավային Կորեան ամենասկզբից իսկ հայտարարել էր, որ սպանվածը Հյուսիսային Կորեայի ղեկավարի ավագ եղբայրն է: Ավելի ուշ սա հաստատվել էր փորձաքննությամբ:
