Մենք դեռ ունենք համայնքապետեր, որոնք հին արժեհամակարգի կրողներ են: Այս մասին, այսօր՝ հունիսի 27-ին, ԱԺ-ում «Իմ քայլը» խմբակցության անդամների հետ փակ հանդիպումից հետո լրագրողների հետ զրույցում նշեց Լոռու մարզպետ Անդրեյ Ղուկասյանը:
«Իրենցից ակնկալել նոր տրամաբանության մեջ աշխատանք, համենայնդեպս, անիմաստ է: Նրանք նոր փոփոխությունների կրողները չեն: Այն համայնքապետերը, որոնք թույլ են տալիս որոշակի օրենքի հետ կապված խախտումներ ու չարաշահումներ, իրենք արդեն գործ են ունենում իրավապահների հետ»,-ասաց մարզպետը՝ հավելելով, որ համայնքապետերը ընտրված պաշտոնյաներ են եւ իրենց հրաժարականը կարող է պահանջել միայն իրենց ընտրողը:
«Օրինակ՝ ներդրողների հետ հարաբերություններում իրենք առաջնորդվելով հին տրամաբանությամբ, առաջացնում են խոչընդոտներ: Ես որպես մարզպետ ներդրողների հետ ինքս եմ շփվում եւ փորձում օգտակար լինել: Օրինակ, եթե պետք է հողատարածք, այդ համայնքապետերը կարող են տրամադրել ոչ հստակ ինֆորմացիա, կամ ասել, որ չկան նման հողատարածքներ»,-ասաց Անդրեյ Ղուկասյանը՝ առանց անուններ նշելու: Նա հավելեց, որ դա համատարած բնույթ չի կրում, բայց այդպիսիք քիչ չեն:
Մարզպետը տեղեկացրեց, որ Լոռու մարզում 2-3 համայնքապետի նկատմամբ քրեական գործ կա հարուցված. «Կան հողատարածքներ, որոնք համայնքային են, բայց իրականում գյուղացիներից ոմանք դա օգտագործում են որպես հոտհարք եւ համայնքապետին նախկինում վճարել են 100 դոլար յուրաքանչյուր հեկտարի համար: Երբ ներդրող է գալիս, համայնքապետը փորձում է կոծկել առկա հողերի առկայության փաստը: Մենք հնարավորինս դա հայտնաբերում եւ կանխում ենք»:
Հարցին, թե առաջիկայում ականատես կլինե՞նք մարզի համայնքապետերի դեմ բողոքի ցույցերի, Անդրեյ Ղուկասյանը պատասխանեց. «Չեմ կարող ասել, գուցե»:
