ՕՊԵԿ-ի (Նավթ արտադրող երկրների կազմակերպության) Միջազգային զարգացման հիմնադրամը եւ Ամերիաբանկը կնքեցին 25 մլն ԱՄՆ դոլարի վարկային պայմանագիր` ուղղված Հայաստանում արտաքին առեւտրի զարգացմանը:
Հիմնադրամը եւ Ամերիաբանկն սկսել են համագործակցել 2015թ.: Մասնավորապես, կնքված առաջին պայմանագրի շրջանակներում վարկային միջոցներին ուղղվել են տնտեսության տարբեր ոլորտներում, այդ թվում` մեծածախ առեւտրի, արտադրության, սննդի արդյունաբերության եւ հյուրանոցների ոլորտներում գործող փոքր եւ միջին ձեռնարկություններին (ՓՄՁ):
Նոր վարկը տրամադրվում է առեւտրի ֆինանսավորման շրջանակներում եւ կօգտագործվի Ամերիաբանկի միջազգային առեւտրի ֆինանսավորման պորտֆելն ընդլայնելու նպատակով: Ներկայումս Ամերիաբանկը Հայաստանի խոշորագույն բանկն է ըստ հիմնական ցուցանիշների եւ ունի բոլոր նախադրյալները, որպեսզի շարունակի ակտիվորեն նպաստել ՀՀ բանկային հատվածի զարգացմանը:
ՕՊԵԿ-ի Միջազգային զարգացման հիմնադրամի` մասնավոր հատվածի եւ առեւտրի ֆինանսավորման գծով տնօրենի օգնական Թարեք Ալնասարը նշեց. «Հայաստանի տնտեսությունում տեղի են ունեցել մեծ բարեփոխումներ, եւ արձանագրվել է կայուն աճ: Միասին ՕՊԵԿ-ի Միջազգային զարգացման հիմնադրամը եւ Ամերիաբանկը նպատակ ունեն նպաստել տարածաշրջանում սոցիալ-տնտեսական առաջընթացին եւ դա անում են ՓՄՁ-ներին աջակցելու միջոցով, քանի որ ՓՄՁ-ները ցանկացած զարգացող երկրի համար տնտեսության կենսական տարր են: Համաշխարհային առեւտրի շուրջ 80-90 տոկոսն ապահովում է առեւտրի ֆինանսավորումը (մեծ մասամբ կարճաժամկետ), եւ մենք շատ ուրախ ենք, որ հնարավորություն ունենք մեր ներդրումն ունենալ այս ոլորտում` նպաստելով առեւտրի ֆինանսավորման շուկայում ֆինանսական հոսքերի անընդհատությանը եւ կապերի ամրապնդմանը»:
Ամերիաբանկի տնօրինության նախագահ-գլխավոր տնօրեն Արտակ Հանեսյանը նշեց. «Մենք ուրախ ենք վերստին համագործակցել ՕՊԵԿ-ի Միջազգային զարգացման հիմնադրամի հետ` բարենպաստ պայմաններ ստեղծելով հաճախորդների համար եւ օգնելով նրանց բարձրացնել իրենց առեւտրային գործունեության արդյունավետությունը: Նոր վարկային միջոցները թույլ կտան ընդլայնել առեւտրի ֆինանսավորման մեր հնարավորությունները եւ նոր դռներ բացել ՓՄՁ-ների համար, խթանել Հայաստանի տնտեսությունը եւ ստեղծել նոր աշխատատեղեր: Ցանկանում եմ երախտիքս հայտնել մեր գործընկերներին` առեւտրի ֆինանսավորման ընդլայնմանը նպաստելու համար: Վստահ եմ, որ սա իր հերթին մեծապես կնպաստի Հայաստանի տնտեսության զարգացմանը»:
