Հասարակությունը «սեւերի» եւ «սպիտակների» բաժանելը ստեղծում է դրանում ատելության մթնոլորտ: Այդ մասին հուլիսի 19-ին «Բռնության եւ ատելության խոսք» թեմայի շուրջ քննարկման ժամանակ հայտարարել է «Մեդիա պաշտպան» նախաձեռնության ղեկավար Աղասի Ենոքյանը:
Նրա խոսքով՝ դա հանգեցրել է այսպես կոչված ենթահասարակության ի հայտ գալուն, որի կողմնակիցները մտածում են միայն սեփական շահերի մասին:
«Երբ տվյալ մարդը դառնում է հասարակական քննադատության առարկա, նա դադարում է համարվել այդ ենթահասարակության ցանկալի մասը»,-նշել է նա:
Աղասի Ենոքյանն ավելացրել է, որ եկել էր մի պահ, երբ վիրավորանքը, այդ թվում՝ երկրի ղեկավարության կողմից, թուլացել էր, սակայն դատական համակարգի շուրջ իրավիճակի հետ կապված՝ այդ միտումը կրկին ակտիվացել է:
«Անհրաժեշտ է անհատապես նշել նրանց, ովքեր տարածում են ատելության մթնոլորտը, հակառակ դեպքում այդ երեւույթի հետ պայքարը հաջողություն չի ունենա»,-ամփոփել է փորձագետը: