Հայաստանի Վերահսկիչ պալատը ստուգումներ է իրականացնում Գյումրիի սոցիալական ապահովության տարածքային բաժնում, որոնք կամփոփի հունիսին: Այդ ամփոփումից հետո էլ պարզ կդառնա, թե արդյոք այդ ծառայությունում չարաշահումներ թույլ տվե՞լ են, թե` ոչ:
«Խոշոր աղաղակող թերություններ չեն լինի, բայց մանր-մունր թերությունները չեմ կարող բացառել»,-NEWS am-ի թղթակցի հետ զրույցում ասել է Գյումրիի սոցիալական ապահովության տարածքային բաժնի պետ Էդուարդ Վարժապետյանը:
Այդ ստուգումները նպաստառու գյումրեցիների կարծիքով ուշացած են, եւ արձանագրված կամ արձանագրվող չարաշահումներն էլ բացահայտ կոռուպցիայի հետեւանք են:
Նշենք, որ արձանագրված չարաշահումների պատճառով այս տարվանից «Հայփոստ» ՓԲԸ-ն է իրականացնում կենսաթոշակների վճարումը։ ՀՀ նախագահ Սերժ Սարգսյանի հրահանգն է ՝ «կա կենսաթոշակառու, կա վճարում, չկա կենսաթոշակառու, ուրեմն ցանկացած վճարում համարվելու է խախտում, իսկ մեղավորները խստագույնս պատժվելու են»։
