«Ամերիաբանկն» այսօր՝ օգոստոսի 26–ին, խաղարկեց Եվրո-2020-ի ընտրական փուլի՝ սեպտեմբերի 5–ին կայանալիք Հայաստան - Իտալիա ֆուտբոլային հանդիպման 250 տոմս բանկի քարտապանների միջև։
«Ամերիաբանկի» անհատական բանկային ծառայությունների եւ քարտերի վարչության ղեկավար Էլեն Դանիելյանի խոսքով՝ այս նախաձեռնության նպատակը քարտապանների քանակն ավելացնելը չի եղել. «Նպատակը անկախ գործարքների ավելացումն էր եւ ձեւավորել վարքագիծ, որպեսզի մարդիկ ավելի շատ օգտվեն անկանխիկ, ոչ թե կանխիկ տարբերակով, քանի որ անկանխիկ գործարքները նաեւ նպաստում են տնտեսության՝ ստվերից դուրս գալուն»։
Նրա խոսքով՝ «Վիզա» ընկերության հետ համատեղ են սկսել այս արշավը. «Վիզա կլասիկ եւ վիզա գոլդ քարտապանները, կատարելով անկանխիկ 15 գործարք 10.000 դրամ նվազագույն արժեքով, հնարավորություն են ունեցել մասնակցելու ֆուտբոլային տոմսի խաղարկությանը։ Հուսանք, որ կնպաստեք մեր թիմի հաղթանակին եւ կունենանք շատ տպավորիչ խաղ»,– ասաց Դանիելյանը։
Նրա խոսքով՝ անկանխիկ գործարքները միշտ են եղել «Ամերիաբանկի» ուշադրության կենտրոնում. «Որպես արդյունք՝ մեր քարտերով գործարքներն էապես գերազանցում են համակարգի նմանատիպ ցուցանիշները, մասնավորապես, «Ամերիաբանկի» քարտապանների գործարքների 58%-ը անկանխիկ են իրականացվում, մինչդեռ ընդհանուր համակարգի ցուցանիշը 42.7% է»։