WhatsApp մեսենջերը սկսել է թեսթավորել անհետացող հաղորդագրությունների գործառույթը, հայտնում է The Verge-ը։ Դրա օգնությամբ օգտատերերը կարող են որոշակի ժամանակահատված տրամադրել, որի ընթացքում հավելվածն ինքնուրույն կհեռացնի ընտրված հաղորդագրությունը։
Այսպիսի հնարավորություն արդեն հայտնվել է Android-ի համար մեսենջերի 2.19.275 տարբերակում, սակայն այն դեռեւս բոլորին հասանելի չէ եւ թեսթ է անցնում, նշում է սպասարկման մասին նորությունների վրա մասնագիտացած WABetaInfo կայքը։
WABetaInfo-ի հրապարակած սքրինշոթերից հետեւում է, որ օգտատերը կարող է անհետացող հաղորդագրության համար թայմեր միացնել միայն խմբային չաթերում։ Հաղորդագրության հեռացումը կարելի է պլանավորել ուղարկելուց հինգ վայրկյան կամ մեկ ժամ հետո։
WABetaInfo-ն չի հստակեցնում, թե երբ գործառույթը բոլորին հասանելի կլինի, քանի որ ընկերությունները նոր են մեկնարկել դրա թեսթավորումը։ Telegram-ում այդ գործառույթը գաղտնի չաթերում հասանելի է 2013-ից, սովորական չաթերում՝ 2017-ից։ Մարտից Telegram-ը օգտատերերին թույլ է տալիս հեռացնել ողջ անձնական նամակագրությունը ինչպես իրենց, այնպես էլ զրուցակիցների մոտ։