MasterCard-ը, Visa-ն եւ ֆինանսական այլ գործընկերներ հրաժարվում են մասնակցել Facebook սոցցանցին պատկանող Libra կրիպտոարժույթի ստեղծմանը: Պատճառը ԱՄՆ եւ եվրոպական երկրների իշխանությունների կողմից քննադատությունն է, հաղորդում է ՌԲԿ-ն՝ հղում անելով The Wall Street Journal-ին:
Պարբերականի տեղեկություններով՝ Libra Association կոալիցիայում ներառված մի քանի ֆինանսական կազմակերպություններ մտադիր են հրաժարվել ծրագրի աջակցումից, քանի որ չեն ցանկանում իրենց հանդեպ գրավել կարգավորիչների ուշադրությունը:
Կրիպտոարժույթի նախագիծը քննադատության է արժանացել G7-ի երկրների եւ ամերիկացի ինչպես հանրապետական, այնպես էլ դեմոկրատ օրենսդիրների կողմից: Ֆրանսիայի ֆինանսների նախարար Բրյունո լե Մերն առաջարկել է սեփական թվային արժույթը ստեղծել՝ Եվրոպայում Libra-ի թողարկման անհրաժեշտության մասին քննարկումների ֆոնին:
Libra-ն կրիպտոարժույթ է, որը Facebook սոցցանցը մտադիր է թողարկել 2020-ի առաջին կեսին: Թվային դրամապանակը կներդրվի Facebook Messenger-ում եւ WhatsApp-ում: