«OPEN east media think tank» միջոցառմանը՝ լրագրողների եւ ԵՄ ֆինանսավորած տարածաշրջանային ծրագրերի շահառուների ոչ պաշտոնական հանդիպմանը մասնակցել են հայկական լրատվամիջոցների ներկայացուցիչներ, հասարակական գործիչներ:
Հոկտեմբերի 4-ին միջոցառումը կազմակերպել էր EU Neighbors East-ը: Հանդիպման հիմնական նպատակն էր ծրագրերի կոնկրետ արդյունքների եւ մարդկանց կյանքի վրա ազդեցության քննարկումը, ինչպես նաեւ Հայաստանի քաղաքացիների համար ԵՄ հնարավորությունները: Մասնակիցները ներկայացրին գիտության եւ ինովացիաների ոլորտում «Հորիզոն 2020» ծրագրի հնարավորությունները, EU4Business-ը, SMEDA-ն՝ Հայաստանում ինովացիոն ՓՄՁ-ներին աջակցություն, EU4Youth նախաձեռնությունը: Զեկույցներով հանդես եկան տարբեր ծրագրերի շահառուները եւ պատմեցին իրենց նախագծերի ու հնարավորությունների մասին, որոնք ներկայացնում են այդ ծրագրերը:
Հայաստայնում ԵՄ պատվիրակության ղեկավար Անդրեա Վիկտորինը նշեց, որ ԵՄ-ն աջակցում է գիտելիքների վրա հիմնված տնտեսության զարգացումը: «Մենք ցանկանում ենք բարելավել հայերի կյանքը, եւ սա մեր նպատակն է: Ես անչափ ուրախ եմ, որ այս միջոցառումը հրաշալի կցուցադրի այն, ինչ մենք Հայաստանում անում ենք:
Մենք Հայաստանին աջակցում ենք գիտելիքների վրա հիմնված տնտեսության զարգացման առանցքային ոլորտներում: Մենք պետք է ձեռներեցներին եւ ինովացիաներն աջակցենք որպես գիտելիքների վրա հիմնված տնտեսության հիմք, ինչպես նաեւ կրթությանը, գիտությանը եւ մարզերում համագործակցությանը, քանի որ Երեւանը դեռեւս ամբողջ Հայաստանը չէ: Մենք նաեւ աջակցում ենք ձեռնարկատիրությունը կանանց եւ երիտասարդների շրջանում: Մենք ցանկանում ենք մեր ավանդը բերել փոքր եւ միջին ձեռնարկությունների զարգացման մեջ, քանի որ դրա վրա է հիմնված հաջող տնտեսությունը»,- հայտարարեց Վիկտորինը:
ԵՄ երիտասարդ դեսպանները նաեւ պատմեցին իրենց ցանցի եւ ամբողջ Հայաստանում քաղաքացիական հասարակությանը ծրագրերին ներգրավելու մասին:
EU Neighbors East-ը ԵՄ-ի կողմից ֆինանսավորվող նախագիծ է, որն ուղղված է Արեւելյան հարեւանության երկրների հետ գործընկերային հարաբերությունների ամրապնդմանը եւ քաղաքացիների հետ կապերի հաստատմանը: