News
Լրահոս
News
Չորեքշաբթի
Նոյեմբեր 20
USD
476.98
EUR
527.68
RUB
7.46
ME-USD
0.06
Տեսնել լրահոսը

The New York Times պարբերականում հրապարակված անստորագիր հոդվածի հեղինակը, որը խոստովանություն էր պարունակում Դոնալդ Թրամփի աշխատակազմի մի մասի կողմից նրա մի շարք որոշումների փաստացի սաբոտաժի մասին, ամերիկացի առաջնորդի մասին գիրք է գրել եւ պատրաստվում է այն թողարկել, հայտնում է СNN-ն:

Հեռուստաալիքի տեղեկություններով՝ Սպիտակ տան չներկայացած բարձրաստիճան աշխատակցի գիրքը կոչվում է A Warning («Նախազգուշացում»): Twelve հրատարակչատան կայքում հրապարակված տեղեկության համաձայն՝ գիրքը կհայտնվի կրպակներում, այս տարվա նոյեմբերի 19-ին հասանելի կլինի նաեւ առցանց պատվերի համար: «Թրամփի նախագահության աննախադեպ անդրկուլիսային դիմանկար՝ վարչակազմի անանուն բարձրաստիճան աշխատակցի կողմից»,- նշված է հրատարակչատան կայքում գրքի նկարագրության մեջ:

Հեռուստաընկերությունը նշում է, որ հեղինակը նախընտրել է հետագայում եւս թաքցնել իր անձը: СNN-ի աղբյուրների տվյալներով՝ նրա անվան գաղտնիությունը պահպանելու համար ընդունվել են անվտանգության լուրջ միջոցառումներ: Ընդ որում՝ աղբյուրները նշում են, որ հեղինակը ապացույցներ է ներկայացրել, որ անցյալ տարի հենց ինքն է եղել The New York Times-ում սկանդալային հրապարակման հեղինակը:

2018 թվականի սեպտեմբերի 5-ին The New York Times-ը հոդված էր հրապարակել, որի հեղինակը, նրա վկայությամբ, ամերիկյան վարչակազմի բարձրաստիճան աշխատակից է: Հոդվածում նշվում էր, որ ԱՄՆ կառավարության ղեկավարության շրջանում գործում է Թրամփին «դիմադրության շարժում», որին է դասվում նաեւ ինքը՝ հեղինակը: Նրա խոսքով՝ ԱՄՆ վարչակազմի «բարձրաստիճան շատ պաշտոնյաներ ջանադրորեն աշխատում են, որ թույլ չտան նախագահի օրակարգի մի մասի եւ նրա ամենավատթար մտադրությունների իրականացումը»: Հոդվածում նշվում էր, որ այդ շարժումը, ըստ էության, սաբոտաժի է ենթարկում Թրամփի այն որոշումները, որոնք սխալ եւ վնասակար է համարում, այդ թվում՝ ՌԴ-ի հետ հարաբերությունները կարգավորելու փորձերը:

Այս հրապարակումից անմիջապես հետո, ինչպես հայտնել է The Washington Post պարբերականը, Թրամփը եւ նրա օգնականները ձեռնամուխ են եղել հոդվածի հեղինակին հայտնաբերելուն: Պարբերականի տեղեկություններով՝ հրապարակումը հարուցել է նախագահի «հրաբխային զայրույթի նոպա եւ նրան անսահման կատաղության է հասցրել»:

!
Այս նյութը հասանելի է նաև   English and Русский
Տպել
Ամենաշատ