Պետդեպարտամենտի աշխատակիցների հրապարակած գաղտնազերծված հաշվետվությունում նշվում է, որ Թուրքիայի նախագահ Ռեջեփ Թայիփ Էրդողանի թիկնապահները «անհայտ աերոզոլ» են փչել 2017 թվականի մայիսին Վաշինգտոնում։ Այս մասին տեղեկացնում է Ամերիկայի Հայ դատի հանձնախումբը։

Պետդեպարտամենտում անվտանգության ապահովման բաժնի լիազորված անձը պաշտոնական հաշվետվությունում տեղեկացրել է, որ մայրաքաղաքի ոստիկանության աշխատակիցները հայտարարել են, թե Թուրքիայի նախագահի անվտանգության ուժերն օգտագործել են մի ինչ-որ անհայտ աերոզոլ բողոքողների դեմ։ Լիազորված անձը պատասխանատու է եղել Թուրքիայի նախագահի անվտանգության համար Վաշինգտոն այցի ընթացքում։

Հայ դատի հանձնախումբը դիմել է պետքարտուղար Մայք Պոմպեոյին՝ անվտանգության օտարերկրյա ուժերի կողմից ԱՄՆ մայրաքաղաքում ամերիկացիների դեմ աերոզոլ օգտագործելու առիթով հետաքննության արդյունքները հրապարակելու խնդրանքով։